ప్రతి కుటుంబానికి రూ.5 లక్షల జీవిత బీమా భరోసా:ఎమ్మెల్యే కాలే యాదయ్య
నవాబు పేట్, మేజర్ న్యూస్: రాష్ట్రంలోని ప్రతి కుటుంబానికి ఆర్థిక భద్రత, భరోసా కల్పించడమే లక్ష్యంగా ప్రభుత్వం ఇందిరమ్మ కుటుంబ జీవిత బీమా పథకాన్ని ప్రవేశపెట్టిందని చేవెళ్ల ఎమ్మెల్యే కాలే యాదయ్య తెలిపారు. శుక్రవారం నవాబుపేట మండలం మాదిరెడ్డిపల్లి గ్రామంలో ఇందిరమ్మ కుటుంబ జీవిత బీమా పథకాన్ని ఆయన ప్రారంభించారు.ఈ సందర్భంగా ఎమ్మెల్యే కాలేయాదయ్య మాట్లాడుతూ.. కుటుంబాన్ని పోషించే వ్యక్తి అనుకోని కారణాలతో మరణిస్తే ఆ కుటుంబం ఆర్థికంగా ఇబ్బందులకు గురికాకుండా అండగా నిలవడమే ఈ పథకం ప్రధాన ఉద్దేశమని పేర్కొన్నారు. ఈ పథకం ద్వారా రాష్ట్రంలోని ప్రతి అర్హ కుటుంబానికి రూ.5 లక్షల జీవిత బీమా ప్రయోజనం కల్పించనున్నట్లు తెలిపారు.కుటుంబ పోషణ బాధ్యతలు నిర్వహించే 18 నుంచి 59 సంవత్సరాల వయస్సు గల సభ్యుడిని బీమా పరిధిలోకి తీసుకుంటారని, ఆధార్ కార్డు, వయస్సు ధ్రువీకరణ పత్రాల ఆధారంగా వివరాలు సేకరిస్తారని వివరించారు. దివంగత మాజీ ప్రధాని ఇందిరాగాంధీ జయంతి సందర్భంగా ప్రారంభించిన ఈ పథకం కోసం గ్రామీణ, పట్టణ ప్రాంతాల్లో ప్రత్యేక శిబిరాలు ఏర్పాటు చేసి అర్హులైన కుటుంబాల నుంచి దరఖాస్తులు స్వీకరిస్తారని తెలిపారు.ఈ పథకం పేద, మధ్యతరగతి కుటుంబాలకు ఆపద సమయంలో ఆర్థిక అండగా నిలుస్తుందని ఎమ్మెల్యే ఆశాభావం వ్యక్తం చేశారు. చేవెళ్ల నియోజకవర్గ ప్రజలు పథకానికి సంబంధించిన వివరాలు తెలుసుకొని, అర్హులైన వారు దరఖాస్తు చేసుకుని ప్రభుత్వ సంక్షేమ పథకాన్ని సద్వినియోగం చేసుకోవాలని కాలే యాదయ్య కోరారు.