telangana
ఇదేందయ్య సామి ! మీ వేడుకలకోసం రోడ్లు మూసేస్తారా...
వెంగళరావునగర్, మేజర్ న్యూస్:అభివృద్ధి పనులు చేపట్టడం అవసరమే.. వ్యక్తిగత వేడుకలు నిర్వహించుకోవడమూ తప్పు కాదు. కానీ... వీటి కారణంగా ప్రజలకు, ముఖ్యంగా అత్యవసర వైద్య సేవలకు అంతరాయం కలగకుండా చూసుకోవాల్సిన బాధ్యత ప్రతి ఒక్కరిపై ఉంది. అయితే వెంగళరావునగర్ డివిజన్లోని పలు ప్రాంతాల్లో తరచూ రోడ్లను పూర్తిగా మూసివేయడం, తవ్వకాలు చేపట్టడంతో వాహనదారులు తీవ్ర ఇబ్బందులు ఎదుర్కొంటున్నారు. తాజాగా అంబులెన్స్ సైతం వెళ్లేందుకు మార్గం లేకపోవడం ఆందోళన కలిగిస్తోంది. వెంగళరావునగర్ డివిజన్లోని డీ-బ్లాక్లో గురువారం ఓ కుటుంబం వేడుక నిర్వహణ కోసం రోడ్డుకు అడ్డంగా సైడ్వాల్స్ ఏర్పాటు చేయడంతో రాకపోకలకు అంతరాయం ఏర్పడినట్లు స్థానికులు చెబుతున్నారు. మరోవైపు మధురానగర్ డీ బ్లాక్లో డీ-74 సమీపంలో సీసీ రోడ్డు నిర్మాణ పనుల కోసం తవ్వకాలు చేపట్టారు. ఇదే విధంగా హైడ్రా కమిషనర్ రంగనాథ్ నివాసం పక్కన కూడా రోడ్డును పూర్తిగా తవ్వేయడంతో ఆ రోడ్డులో కూడా రాకపోకలకు వీలు లేకుండా పోయింది. ఆ రోడ్డును కాదని ముందుకు నేరుగా వెళదామన్నా రోడ్డు తవ్వకాల కారణంగా ఆ దారి మూసేసారు. దీంతో ఆయా ప్రాంతాల్లో రాకపోకలకు ఇబ్బందులు తలెత్తుతున్నాయి.
అంబులెన్స్ కు దారిలేక...
ఈ క్రమంలో గురువారం ఓ అంబులెన్స్ వెళ్లేందుకు సరైన మార్గం లేక అటూ ఇటూ తిరగాల్సి వచ్చిందని కొందరు ఆవేదన వ్యక్తం చేసారు. రోగి ప్రాణాలను కాపాడేందుకు అంబులెన్స్ సకాలంలో ఆసుపత్రికి చేరుకోవడం ఎంత ముఖ్యమో ప్రత్యేకంగా చెప్పాల్సిన అవసరం లేదు. ఇలాంటి పరిస్థితుల్లో నిమిషాల ఆలస్యం కూడా ప్రాణాల మీదకు వచ్చే ప్రమాదం ఉంది.
సిద్ధార్థనగర్ లోనూ....
కొద్ది రోజుల క్రితం పక్కనే ఉన్న సిద్ధార్థనగర్ లో కూడా కొందరు తమ ఇళ్లల్లో జరిగిన కార్యక్రమానికి రోడ్డును పూర్తిగా మూసేయడంతో ప్రయాణీకులు ఇబ్బందులు పడ్డారు. వీరేగాక,
అభివృద్ధి పనులు చేపట్టే అధికారులు సైతం ముందస్తు ప్రణాళికతో వ్యవహరించాలి. ఒకే సమయంలో అన్ని రహదారులను తవ్వకుండా, కనీసం ఒక మార్గాన్ని రాకపోకలకు అందుబాటులో ఉంచాలి. ప్రత్యామ్నాయ దారుల వివరాలతో సూచిక బోర్డులు ఏర్పాటు చేయాలి. వేడుకలు నిర్వహించుకునే వారు కూడా రోడ్లను పూర్తిగా దిగ్బంధించేలా సైడ్ వాల్స్, బారికేడ్స్, ఇతర అడ్డంకులు ఏర్పాటు చేయకుండా ప్రజల ఇబ్బందులను దృష్టిలో పెట్టుకోవాలి.
రోడ్లు అందరివీ...
మన వేడుకలు, మన అభివృద్ధి పనులు ఇతరుల ప్రాణాలకు, అత్యవసర సేవలకు అడ్డంకిగా మారకూడదు. రోడ్లు అందరివి.. వాటిపై రాకపోకలు సాగించే హక్కు అందరికీ ఉంది. ఈ విషయాన్ని అధికారులు, నిర్వాహకులు, ప్రజలు గుర్తించి బాధ్యతగా వ్యవహరించాల్సిన అవసరం ఎంతైనా ఉంది.