ప్రజాపాలనలో భాగంగా ఉమ్మడి మెదక్ జిల్లా ఉన్నత స్థాయి సమీక్ష సమావేశం

సంగారెడ్డి: ప్రజాపాలనలో భాగంగా ఉమ్మడి మెదక్ జిల్లా అభివృద్ధి, ప్రజా సమస్యల పరిష్కారం, ప్రభుత్వ సంక్షేమ పథకాల అమలు తదితర అంశాలపై సమీక్షించేందుకు సంగారెడ్డి జిల్లా కేంద్రంలోని జిల్లా పరిషత్ కార్యాలయ సమావేశ మందిరంలో ఉన్నత స్థాయి సమీక్ష సమావేశం ప్రారంభమైంది. ఈ సమావేశానికి రాష్ట్ర మంత్రులు దామోదర్ రాజనర్సింహ, పొంగులేటి శ్రీనివాస్ రెడ్డి, వివేక్ వెంకటస్వామి ముఖ్య అతిథులుగా హాజరయ్యారు.ఉమ్మడి మెదక్ జిల్లాలోని మెదక్, సంగారెడ్డి, సిద్దిపేట జిల్లాల పరిధిలో ప్రభుత్వ అభివృద్ధి కార్యక్రమాల పురోగతి, ప్రజలకు అందుతున్న సంక్షేమ పథకాల ఫలాలు, వివిధ శాఖల పనితీరు, పెండింగ్‌లో ఉన్న సమస్యలు తదితర అంశాలపై ఈ సమీక్ష సమావేశంలో చర్చించనున్నారు.ఈ సమావేశంలో మెదక్ పార్లమెంట్ సభ్యులు రఘునందన్ రావు, ఎమ్మెల్సీలు అంజిరెడ్డి, కొమరయ్య, శాసనసభ్యులు డాక్టర్ సంజీవరెడ్డి, చింత ప్రభాకర్, మాణిక్ రావు, సునీత లక్ష్మారెడ్డి, ప్రభాకర్ రెడ్డి పాల్గొన్నారు.అలాగే రెవెన్యూ శాఖ ముఖ్య కార్యదర్శి లోకేష్ కుమార్, మెదక్, సంగారెడ్డి, సిద్దిపేట జిల్లాల కలెక్టర్లు, వివిధ ప్రభుత్వ శాఖలకు చెందిన ఉన్నతాధికారులు సమావేశానికి హాజరయ్యారు.ప్రజాపాలన లక్ష్యాలకు అనుగుణంగా ప్రజలకు మెరుగైన సేవలు అందించడం, ప్రభుత్వ పథకాలను అర్హులైన లబ్ధిదారులకు చేరవేయడం, జిల్లాల వారీగా అభివృద్ధి కార్యక్రమాలను వేగవంతం చేయడం, ప్రజలు ఎదుర్కొంటున్న సమస్యలకు పరిష్కార మార్గాలను అన్వేషించడం వంటి అంశాలకు ఈ సమావేశంలో ప్రాధాన్యత ఇవ్వనున్నారు.మూడు జిల్లాలకు సంబంధించిన అభివృద్ధి, సంక్షేమ కార్యక్రమాలపై సమగ్ర సమీక్ష నిర్వహించడం ద్వారా ప్రభుత్వ శాఖల మధ్య సమన్వయాన్ని మరింత బలోపేతం చేయడంతో పాటు, క్షేత్రస్థాయిలో ఎదురవుతున్న సమస్యలను గుర్తించి వాటి పరిష్కారానికి అవసరమైన చర్యలు చేపట్టే దిశగా ఈ ఉన్నత స్థాయి సమావేశం కొనసాగుతోంది.