కూటమి విజయం ఖాయం.. విపక్షాల ఆశలు అడియాశలే: సీట్ల సర్దుబాటుపై బీజేపీ రాష్ట్ర అధ్యక్షుడు మాధవ్

అమరావతి: అధికార కూటమిలో విభేదాలు వచ్చి బీటలు వారుతుందని ప్రత్యర్థులు ఎంతగానో ఎదురు చూశారని, కానీ ఆ అవకాశమే లేకుండా అత్యంత పారదర్శకంగా, సునాయాసంగా సీట్ల సర్దుబాటు పూర్తయిందని భారతీయ జనతా పార్టీ (బీజేపీ) ఆంధ్రప్రదేశ్ రాష్ట్ర అధ్యక్షుడు పీవీఎన్ మాధవ్ తెలిపారు. స్థానిక సంస్థల ఎన్నికల నేపథ్యంలో కూటమి అగ్రనేతలు చంద్రబాబు నాయుడు, పవన్ కల్యాణ్‌లతో కలిసి నిర్వహించిన ఉమ్మడి విలేకరుల సమావేశంలో ఆయన మాట్లాడారు.

మూడు పార్టీల నాయకులమంతా ఒకేతాటిపైకి వచ్చి, క్షేత్రస్థాయి పరిస్థితులను బట్టి సుదీర్ఘంగా చర్చించి సీట్ల పంపకాలను కొలిక్కి తెచ్చామని మాధవ్ స్పష్టం చేశారు. రాష్ట్రంలో ఎల్‌నినో ప్రభావం వల్ల ఆర్థిక, వాతావరణపరమైన సవాళ్లు ఎదురైనప్పటికీ, ప్రభుత్వం వాటన్నింటినీ అధిగమించి అభివృద్ధి పథంలో ముందుకు సాగుతోందని పేర్కొన్నారు.

2024 అసెంబ్లీ ఎన్నికల్లో ప్రజలు కూటమిపై ఎంతటి అపారమైన నమ్మకాన్ని, విశ్వాసాన్ని ఉంచారో.. రాబోయే స్థానిక సంస్థల ఎన్నికల్లోనూ అదే స్థాయి విశ్వాసాన్ని మళ్లీ చూపించి కూటమి అభ్యర్థులను అత్యధిక మెజారిటీతో గెలిపించాలని ఆయన పిలుపునిచ్చారు. కూటమి నాయకులు, కార్యకర్తలు కిందిస్థాయి వరకు సమన్వయంతో పనిచేసి చారిత్రాత్మక విజయాన్ని అందించాలని ఆకాంక్షించారు.