telangana
ప్రభుత్వ కార్యాలయాలు, గ్రామపంచాయతీల్లో సమాచార బోర్డులు ఏర్పాటు చేయాలి
సూర్య, పెంచికల్పేట్: మండలంలోని అన్ని ప్రభుత్వ కార్యాలయాల్లో ప్రజలకు అవసరమైన సమాచారంతో కూడిన బోర్డులు ఏర్పాటు చేయాలని జిల్లా సమాచార హక్కు రక్షణ చట్టం కమిటీ జిల్లా ప్రధాన కార్యదర్శి కుమ్మరి లింగయ్య కోరారు. ఈ మేరకు సోమవారం పెంచికల్పేట్లో నిర్వహించిన ప్రజావాణి కార్యక్రమంలో ఎంపీడీఓ గాజుల శ్రీనివాస్ కు వినతిపత్రం అందజేశారు.ప్రభుత్వ కార్యాలయాల్లో అధికారుల పేర్లు, హోదాలు, సంప్రదింపు నంబర్లు, పని వేళలు, అందించే సేవలు, దరఖాస్తు విధానం, అవసరమైన పత్రాలు, ఫిర్యాదుల స్వీకరణ అధికారి వివరాలను ప్రజలకు స్పష్టంగా తెలిసేలా తెలుగు భాషలో సమాచార బోర్డులు ఏర్పాటు చేయాలని కోరారు. సరైన సమాచారం అందుబాటులో లేక సామాన్యులు, నిరుపేదలు, వృద్ధులు కార్యాలయాల చుట్టూ తిరగాల్సి వస్తోందని పేర్కొన్నారు.అదేవిధంగా గ్రామపంచాయతీల్లో సమాచార హక్కు చట్టం బోర్డులతో పాటు గ్రామపంచాయతీలకు వచ్చే నిధులు, చేసిన ఖర్చులు, మిగులు నిధుల వివరాలను కూడా బోర్డులపై ప్రదర్శించాలని కోరారు. ప్రజలకు ప్రభుత్వ సేవలు పారదర్శకంగా అందేలా సంబంధిత అధికారులు చర్యలు తీసుకోవాలనీ తెలిపారు.