పంటలను పరిశీలించిన వ్యవసాయ అధికారి రామకృష్ణ

సూర్య, పెంచికల్‌పేట్: పెంచికల్‌పేట్ మండలంలోని గుంట్లపేట్, బొంబాయిగూడ గ్రామాల్లో శనివారం మండల వ్యవసాయ అధికారి రామకృష్ణ క్షేత్రస్థాయిలో పర్యటించి రైతులు సాగు చేస్తున్న మిర్చి, కంది పంటలను పరిశీలించారు. పంటల ప్రస్తుత పరిస్థితిని పరిశీలిస్తూ చీడపీడల నివారణకు తీసుకోవాల్సిన జాగ్రత్తలపై రైతులకు అవగాహన కల్పించారు.కంది పంట ప్రస్తుతం పూత దశలో ఉన్నందున పుష్పాలు, కాయలను ఆశించే పురుగుల నివారణకు వ్యవసాయ శాఖ సిఫారసు చేసిన మందులను నిర్ణీత మోతాదులో పిచికారీ చేయాలని సూచించారు. పూత, కాయ దశలో వచ్చే తెగుళ్లు, పురుగుల పట్ల అప్రమత్తంగా ఉండాలని తెలిపారు.అదేవిధంగా మిర్చి పంటలో చీడపీడల నివారణకు తగిన మందులను సూచించిన మోతాదులోనే వినియోగించాలని, వ్యవసాయ శాఖ అధికారుల సూచనలు పాటిస్తూ పంటల సంరక్షణ చర్యలు చేపట్టాలని రైతులకు సూచించారు. పంటల సాగులో ఏవైనా సమస్యలు, సందేహాలు ఎదురైతే వ్యవసాయ శాఖ అధికారులను సంప్రదించాలని వ్యవసాయ అధికారి రామకృష్ణ కోరారు.ఈ కార్యక్రమంలో రైతులు పాల్గొన్నారు.