పెండింగ్ కేసులను త్వరగా పరిష్కరించాలి: ఎస్పీ స్నేహ మెహ్రా

వికారాబాద్ జిల్లా ప్రతినిధి, మేజర్ న్యూస్: పెండింగ్ కేసుల దర్యాప్తును వేగవంతం చేసి నిర్ణీత సమయంలో పరిష్కరించాలని వికారాబాద్ జిల్లా ఎస్పీ స్నేహ మెహ్రా, ఐపీఎస్ పోలీసు అధికారులను ఆదేశించారు. వార్షిక తనిఖీల్లో భాగంగా మంగళవారం పరిగి సబ్ డివిజన్ పోలీస్ కార్యాలయాన్ని తనిఖీ చేసిన ఆమె రికార్డులు, కేసుల ఫైళ్లను పరిశీలించి పోలీస్ స్టేషన్ల పనితీరు, నేరాల నియంత్రణ, కేసుల పురోగతిపై సమీక్షించారు. ఆస్తి నేరాలు, ఎన్‌డీపీఎస్, సైబర్ నేరాలు, మహిళలు, చిన్నారులకు సంబంధించిన కేసుల దర్యాప్తులో ప్రత్యేక శ్రద్ధ వహించాలని సూచించారు. సీసీటీఎన్‌ఎస్‌లో కేసుల వివరాలను ఎప్పటికప్పుడు అప్‌డేట్ చేయాలని, సీసీటీవీ కెమెరాల వినియోగాన్ని పెంచాలని, సైబర్ నేరాల ఫిర్యాదులపై తక్షణమే స్పందించాలని ఆదేశించారు. రోడ్డు ప్రమాదాల నివారణకు ట్రాఫిక్ నియంత్రణ చర్యలు చేపట్టడంతో పాటు రాత్రి గస్తీని ముమ్మరం చేయాలని తెలిపారు. ప్రజల ఫిర్యాదులను సత్వరమే పరిష్కరించి మెరుగైన పోలీస్ సేవలు అందించాలని సూచించారు. ఈ కార్యక్రమంలో పరిగి డీఎస్పీ శ్రీనివాస్, పరిగి సీఐ కొండల్ రెడ్డి, కొడంగల్ సీఐ చంద్రశేఖర్ రెడ్డి, సబ్ డివిజన్ ఎస్‌ఐలు, పోలీసు సిబ్బంది పాల్గొన్నారు.