పట్టభద్రుల ఓటరు నమోదును వేగవంతం చేయాలి : ఎమ్మెల్సీ శంభీపూర్ రాజు, ఎమ్మెల్యే కేపీ వివేకానంద్ పిలుపు

దుండిగల్ మేజర్ న్యూస్ : పట్టభద్రుల ఎమ్మెల్సీ ఎన్నికల నేపథ్యంలో అర్హులైన ప్రతి పట్టభద్రుడు ఓటరుగా నమోదు చేసుకునేలా పార్టీ నాయకులు ప్రత్యేక దృష్టి సారించాలని మేడ్చల్ జిల్లా బీఆర్ఎస్ పార్టీ అధ్యక్షుడు, ఎమ్మెల్సీ శంభీపూర్ రాజు, కుత్బుల్లాపూర్ ఎమ్మెల్యే, బీఆర్ఎస్ శాసనసభాపక్ష విప్ కేపీ వివేకానంద్ పిలుపునిచ్చారు. కుత్బుల్లాపూర్ నియోజకవర్గ పరిధిలో పట్టభద్రుల ఓటరు నమోదు ప్రక్రియపై గండిమైసమ్మలోని మేడ్చల్ జిల్లా బీఆర్ఎస్ పార్టీ కార్యాలయంలో ముఖ్య నాయకులు, ప్రజాప్రతినిధులు, పార్టీ శ్రేణులతో సోమవారం ప్రత్యేక సమావేశం నిర్వహించారు. ఈ సందర్భంగా ఓటరు నమోదు పురోగతిపై సమీక్షించి, అర్హులైన పట్టభద్రులందరూ ఎమ్మెల్సీ ఓటరుగా నమోదు చేసుకునేలా విస్తృతంగా అవగాహన కల్పించాలని సూచించారు. గతంలో ఉన్న పట్టభద్రుల ఓటరు జాబితాలను పరిశీలించి, అర్హులైన వారి వివరాలను సేకరించాలని నాయకులకు సూచించారు. ఓటరు నమోదు ప్రక్రియకు నవంబర్ 6 చివరి తేదీ కావడంతో సమయం వృథా చేయకుండా క్షేత్రస్థాయిలో కార్యక్రమాన్ని వేగవంతం చేయాలని స్పష్టం చేశారు. ప్రతి అర్హుడికి సమాచారం చేరవేసి, ఎవరూ ఓటు హక్కు పొందే అవకాశాన్ని కోల్పోకుండా సమన్వయంతో పనిచేయాలని పేర్కొన్నారు. రానున్న పట్టభద్రుల ఎమ్మెల్సీ ఎన్నికల్లో బీఆర్ఎస్ అభ్యర్థి విజయమే లక్ష్యంగా నాయకులు, ప్రజాప్రతినిధులు, అభిమానులు, కార్యకర్తలు బాధ్యతతో పనిచేయాలని శంభీపూర్ రాజు, కేపీ వివేకానంద్ పిలుపునిచ్చారు. పార్టీ శ్రేణులంతా సమన్వయంతో ముందుకు సాగుతూ పట్టభద్రుల ఓటరు నమోదు కార్యక్రమాన్ని విజయవంతం చేయాలని సూచించారు. ఈ సమావేశంలో పార్టీ ముఖ్య నాయకులు, ప్రజాప్రతినిధులు, ఇతర నాయకులు పాల్గొన్నారు.