మద్యం మత్తులో మున్సిపల్ అధికారి హల్‌చల్‌..! దాబాలో శానిటేషన్ డీఈ వీరంగం సృష్టించారంటూ ఆరోపణలు
కొంపల్లి, మేజర్ న్యూస్ :: ప్రజలకు సేవలందించాల్సిన మున్సిపల్ అధికారే మద్యం మత్తులో దాబా నిర్వాహకులతో వాగ్వాదానికి దిగారనే ఆరోపణలు కొంపల్లి సర్కిల్‌లో కలకలం రేపుతున్నాయి. కొంపల్లి శానిటేషన్ డీఈ తిరుపతి ఆదివారం రాత్రి తన సహచరులు రాఘవచారి, ప్రవీణ్‌లతో కలిసి స్థానిక ఫ్రెండ్స్ దాబాకు వెళ్లినట్లు సమాచారం. ఆర్డర్ చేసిన బటర్ మసాలా అందుబాటులో లేదని నిర్వాహకులు చెప్పడంతో ఆగ్రహానికి గురైన అధికారి, 'నేను కొంపల్లి డీఈని.. నీ దాబా ఎలా నడుస్తుందో చూస్తా' అంటూ బెదిరించినట్లు ఆరోపణలు వినిపిస్తున్నాయి. వారానికి మూడుసార్లు వచ్చి ఉచితంగా తినడమే కాకుండా తమపైనే బెదిరింపులకు దిగుతారా అంటూ దాబా నిర్వాహకులు నిలదీసినట్లు తెలుస్తోంది.
వివాదం తీవ్రరూపం దాల్చడంతో నిర్వాహకులు పోలీసులను ఆశ్రయించగా, వ్యవహారం పేట్‌బషీరాబాద్ పోలీస్ స్టేషన్‌కు చేరినట్లు సమాచారం. సదరు అధికారికి నిర్వహించిన బ్రీత్ అనలైజర్ పరీక్షలో పాజిటివ్ వచ్చినట్లు ప్రచారం జరుగుతోంది. అయితే ఈ విషయంపై అధికారిక ధ్రువీకరణ రావాల్సి ఉంది. ఉద్యోగానికి ఇబ్బందులు ఎదురవుతాయనే భయంతో రాజీ కుదుర్చుకున్నట్లు స్థానికంగా చర్చ సాగుతోంది.
మరోవైపు సదరు అధికారి విధుల్లోనూ మద్యం మత్తులో ఉంటారని, కిందిస్థాయి సిబ్బందితో బీరు బాటిళ్లు తెప్పించుకుంటారని, నిరాకరిస్తే ఉద్యోగాలు తొలగిస్తామంటూ బెదిరిస్తారని ఆరోపణలు వినిపిస్తున్నాయి. కక్షసాధింపు చర్యలకు భయపడి బహిరంగంగా ఫిర్యాదు చేయలేకపోతున్నామని కొందరు సిబ్బంది ఆవేదన వ్యక్తం చేస్తున్నారు. గతంలోనూ అధికారుల ప్రవర్తనపై ఫిర్యాదులు చేసినట్లు స్థానిక నాయకులు పేర్కొంటున్నారు. ఈ వ్యవహారంపై ఉన్నతాధికారులు సమగ్ర విచారణ జరిపి, ఆరోపణలు రుజువైతే బాధ్యులపై కఠిన చర్యలు తీసుకోవాలని స్థానికులు డిమాండ్ చేస్తున్నారు.
