యూఎన్‌ఎస్‌సీలో అందరికీ వీటో ఉండాల్సిందే: భారత్ డిమాండ్
సూర్య ఇంటర్నేషనల్ బ్యూరో, న్యూయార్క్: ఐక్యరాజ్యసమితి భద్రతా మండలి సంస్కరణల ప్రక్రియలో వీటో అధికారం లేని కొత్త శాశ్వత సభ్యత్వ ప్రతిపాదనలను భారతదేశం తీవ్రంగా వ్యతిరేకించింది. వీటో అధికారం లేకుండా కొత్త దేశాలను శాశ్వత సభ్యులుగా చేర్చడం వల్ల అవి కేవలం "రెండో తరగతి" సభ్యులుగా మిగిలిపోతాయని, ప్రస్తుత ఐదు శాశ్వత సభ్యదేశాల గుత్తాధిపత్యాన్ని మార్చడంలో ఎలాంటి ప్రయోజనం ఉండదని భారత్ స్పష్టం చేసింది. భద్రతా మండలి సంస్కరణలపై ఐక్యరాజ్యసమితి సర్వసభ్య సమావేశంలో జరిగిన ఇంటర్-గవర్నమెంటల్ నెగోషియేషన్స్ చర్చా వేదికలో ఐరాసలో భారత శాశ్వత ప్రతినిధి, రాయబారి పర్వతనేని హరీశ్ దేశ వైఖరిని కుండబద్దలు కొట్టారు.
అందరికీ సమాన హక్కులు, సమాన బాధ్యతలు ఉండాలి:
వీటో అధికారానికి సంబంధించి భారతదేశ వైఖరి అత్యంత స్పష్టమైనదని, ఇది 'కామన్ ఆఫ్రికన్ పొజిషన్'కు పూర్తి అనుగుణంగా ఉందని హరీశ్ పేర్కొన్నారు. సంస్కరించబడిన భద్రతా మండలిలో వీటో విధానం కొనసాగినంత కాలం, కొత్తగా చేరే శాశ్వత సభ్యులందరికీ సమానంగా ఆ అధికారం లభించాలని స్పష్టం చేశారు. న్యాయం, నిష్పాక్షికతను పరిగణనలోకి తీసుకుంటే శాశ్వత సభ్యులందరూ ఒకే విధమైన హక్కులు, బాధ్యతలను అనుభవించాలని డిమాండ్ చేశారు. కేవలం తాత్కాలిక లేదా వీటో లేని దీర్ఘకాలిక సీట్లను సృష్టించడం సంస్కరణల ప్రక్రియను మరింత జటిలం చేయడమే కాకుండా అసమానతలను శాశ్వతం చేస్తుందని హెచ్చరించారు.
రాజకీయ స్వార్థ ప్రయోజనాలకు వీటోను వాడకూడదు:
అంతర్జాతీయ శాంతి, భద్రతలను కాపాడటంలో వీటో అనేది బాధ్యతతో ఉపయోగించాల్సిన ప్రత్యేక అధికారమని, దానిని సంకుచిత రాజకీయ ప్రయోజనాలకు సాధనంగా మార్చుకోరాదని భారత్ హితవు పలికింది. 1945 నాటి ప్రపంచ వాస్తవాలను ఇప్పటికీ ప్రతిబింబిస్తూ కొనసాగడం భద్రతా మండలి విశ్వసనీయతను దెబ్బతీస్తోందని తెలిపారు. ముక్కలు చెక్కలుగా కాకుండా సమగ్ర సంస్కరణలు మాత్రమే ఫలితాన్నిస్తాయని, కాలపరిమితితో కూడిన టెక్స్ట్-బేస్డ్ చర్చలను తక్షణమే ప్రారంభించాలని ఐరాస సభ్యదేశాలకు పిలుపునిచ్చారు. సమకాలీన ప్రపంచంలో అత్యధిక జనాభా, వేగవంతమైన ఆర్థిక వ్యవస్థ కలిగిన భారత్‌కు భద్రతా మండలిలో సముచిత శాశ్వత స్థానం కల్పించాల్సిన సమయం ఆసన్నమైందని అంతర్జాతీయ వేదికపై పునరుద్ఘాటించారు.
