డీఎల్‌ఎఫ్‌ రహదారి మరో 90 రోజులు మూసివేత ;నేటి నుంచి ట్రాఫిక్‌ ఆంక్షలు అమలు
గచ్చిబౌలి,మేజర్ న్యూస్ : గచ్చిబౌలి పరిధిలోని డీఎల్‌ఎఫ్‌ గేట్‌ నంబర్‌ 1 నుంచి గచ్చిబౌలి ట్రాఫిక్‌ పోలీస్‌ స్టేషన్‌ వరకు రహదారి మూసివేతను మరో 90 రోజులపాటు పొడిగిస్తూ సైబరాబాద్‌ ట్రాఫిక్‌ పోలీసులు నిర్ణయం తీసుకున్నారు. ఫ్లైఓవర్‌, అండర్‌పాస్‌ నిర్మాణ పనుల నేపథ్యంలో ఈ నెల 27 నుంచి ఆంక్షలు అమల్లోకి రానున్నాయి. నిర్మాణ పనుల పురోగతి, అందుబాటులో ఉన్న రహదారి స్థలాన్ని బట్టి కొన్ని ప్రాంతాల్లో దశలవారీగా వాహనాల రాకపోకలకు అనుమతించనున్నారు.
ప్రత్యామ్నాయ మార్గాలివీ.....
రాడిసన్‌ హోటల్‌ నుంచి ఐఐఐటీ జంక్షన్‌కు: రాడిసన్‌ హోటల్‌ వైపు నుంచి డీఎల్‌ఎఫ్‌ మీదుగా ఐఐఐటీ జంక్షన్‌కు వెళ్లే వాహనాలను డీఎల్‌ఎఫ్‌ గేట్‌ నంబర్‌ 1 వరకు మాత్రమే అనుమతిస్తారు. అక్కడి నుంచి ముందుకు వెళ్లేందుకు అనుమతి ఉండదు. వాహనదారులు గచ్చిబౌలి జంక్షన్‌ వద్ద కుడివైపు మలుపు తీసుకొని ఇందిరానగర్‌ మీదుగా ఐఐఐటీ జంక్షన్‌కు చేరుకోవాలి.టీసీఎస్‌ ఉద్యోగులకు మినహాయింపు: నాన్‌-ఎస్‌ఈజెడ్‌ (సీఎంసీ) గేట్‌ ద్వారా రాకపోకలు సాగించే టీసీఎస్‌ ఉద్యోగులు యథావిధిగా తమ గేట్‌ నుంచే ప్రయాణించవచ్చని పోలీసులు స్పష్టం చేశారు.లింగంపల్లి నుంచి రాడిసన్‌ హోటల్‌కు: లింగంపల్లి వైపు నుంచి గచ్చిబౌలి ట్రాఫిక్‌ పోలీస్‌ స్టేషన్‌ వైపు వచ్చే వాహనాలు ఐఐఐటీ జంక్షన్‌ నుంచి గచ్చిబౌలి జంక్షన్‌ వద్ద ఎడమవైపు మలుపు తీసుకోవాలి. అక్కడి నుంచి రాడిసన్‌ జంక్షన్‌ వద్ద మరోసారి ఎడమవైపు తిరిగి డీఎల్‌ఎఫ్‌ ప్రాంతానికి చేరుకోవాలి.
మరో ఏడాది పాటు ఫ్లైఓవర్‌ పనులు.....
ఐఐఐటీ జంక్షన్‌ వద్ద ఫ్లైఓవర్‌ నిర్మాణ పనులు పూర్తయ్యేందుకు కనీసం మరో ఏడాది సమయం పట్టే అవకాశం ఉందని ట్రాఫిక్‌ పోలీసులు వెల్లడించారు. దీంతో ఈ ప్రాంతంలో రద్దీ కొనసాగే అవకాశముంది. ఐటీ ఉద్యోగులు, నిత్యం ఈ మార్గంలో ప్రయాణించే వాహనదారులు ప్రత్యామ్నాయ మార్గాలను ఎంచుకొని, ప్రయాణ సమయాన్ని ముందుగానే ప్రణాళిక చేసుకోవాలని సూచించారు. ట్రాఫిక్‌ నియంత్రణలో పోలీసులకు సహకరించాలని సైబరాబాద్‌ ట్రాఫిక్‌ జాయింట్‌ కమిషనర్‌ వాహనదారులను కోరారు.
