telangana
నేడు మాదాపూర్ తమ్మిడికుంట చెరువు ప్రారంభం
హైదరాబాద్: ఐటీ కారిడార్‌లోని ప్రముఖ ప్రాంతం మాదాపూర్‌లో ఆక్రమణలు, వ్యర్థాలతో కలుషితమైన తమ్మిడికుంట చెరువు సరికొత్త శోభను సంతరించుకుని ప్రారంభానికి సిద్ధమైంది. పునరుద్ధరించిన ఈ చెరువును బుధవారం సాయంత్రం 6 గంటలకు తెలంగాణ ముఖ్యమంత్రి ఎ. రేవంత్ రెడ్డి చేతుల మీదుగా అధికారికంగా ప్రారంభించనున్నారు.
గతంలో ఆక్రమణల బారినపడి కేవలం 12 ఎకరాలకు మాత్రమే పరిమితమై, మురుగు వ్యర్థాలతో నిండిపోయిన తమ్మిడికుంట చెరువును హైదరాబాద్ డిజాస్టర్ రెస్పాన్స్ అండ్ అసెట్ ప్రొటెక్షన్ ఏజెన్సీ (HYDRA) ప్రతిష్టాత్మకంగా తీసుకుని పునరుద్ధరించింది. ఆక్రమణలను తొలగించి, చెరువును ఏకంగా 30 ఎకరాల విస్తీర్ణానికి విస్తరించడంతో పాటు పరిసర ప్రాంతాలను ఎకో-ఫ్రెండ్లీ పర్యాటక ప్రాంతంగా తీర్చిదిద్దింది.
వాకింగ్ ట్రాక్‌లు, ల్యాండ్‌స్కేపింగ్, సందర్శకుల కోసం మౌలిక వసతులతో తీర్చిదిద్దిన ఈ చెరువు, ఐటీ హబ్ మాదాపూర్ పరిధిలో మరో కీలకమైన ల్యాండ్‌మార్క్‌గా మారింది. ఈ ప్రారంభోత్సవ కార్యక్రమంలో పలువురు మంత్రులు, ప్రజాప్రతినిధులు, ప్రభుత్వ ఉన్నతాధికారులు పాల్గొననున్నారు.
