నవంబర్ 7 నుంచి మూడు రోజుల పాటు కొడంగల్‌లో సీఎం రేవంత్ రెడ్డి పర్యటన.!
దుద్యాల, మేజర్ న్యూస్: కొడంగల్ నియోజకవర్గంలో ముఖ్యమంత్రి రేవంత్ రెడ్డి నవంబర్ 7, 8, 9 తేదీల్లో మూడు రోజుల పాటు పర్యటించే అవకాశం ఉన్నట్లు సమాచారం. ఈ పర్యటనలో భాగంగా దుద్యాల మండలం హకీంపేట శివారులో నిర్వహించనున్న ప్రతిష్ఠాత్మక వ్యవసాయ మేళాలో ఏర్పాటు చేసే స్టాళ్లను పరిశీలించడంతో పాటు నియోజకవర్గంలో చేపడుతున్న పలు అభివృద్ధి పనుల పురోగతిని క్షేత్రస్థాయిలో సమీక్షించనున్నట్లు తెలుస్తోంది. హకీంపేట శివారులో నిర్మాణంలో ఉన్న ఎడ్యుకేషన్ హబ్‌, కొడంగల్‌లో నిర్మిస్తున్న వెంకటేశ్వర స్వామి దేవాలయ పనులను పరిశీలించే అవకాశముంది. అలాగే దుద్యాల మండల కేంద్రంలో నిర్మించిన మండల సమీకృత భవనం, దుద్యాల గేట్‌ సమీపంలోని నూతన పోలీస్‌ స్టేషన్‌, హకీంపేటలో నిర్మించిన సమీకృత విద్యాలయం, ప్రాథమిక ఆరోగ్య కేంద్రం, బొంరాస్‌పేటలో నిర్మించిన పోలీస్‌ స్టేషన్‌ భవనాలను ప్రారంభించే అవకాశం ఉన్నట్లు సమాచారం. సీఎం పర్యటన నేపథ్యంలో అధికారులు ఏర్పాట్లపై దృష్టి సారించగా, భద్రతా చర్యలను పటిష్ఠం చేసేందుకు పోలీస్‌ శాఖ సన్నద్ధమవుతున్నట్లు తెలుస్తోంది. అయితే పర్యటనకు సంబంధించిన అధికారిక షెడ్యూల్‌ వెలువడాల్సి ఉంది.
రిపోర్టర్: రమేష్, దుద్యాల్, వికారాబాద్ జిల్లా.
