అక్టోబర్ 30న థియేటర్లలోకి యోగిబాబు సింగారం.. ఘనంగా ఆడియో వేడుక!
సూర్య ఎంటర్‌టైన్‌మెంట్ డెస్క్: కోలీవుడ్ హాస్య నటుడిగా అడుగుపెట్టి ప్రస్తుతం హీరోగా తనకంటూ ప్రత్యేక గుర్తింపు తెచ్చుకున్న ప్రముఖ నటుడు యోగిబాబు ప్రధాన పాత్రలో నటిస్తున్న తాజా చిత్రంపై సినీ వర్గాల్లో భారీ అంచనాలు నెలకొన్నాయి. రాక్ ప్రొడక్షన్స్ పతాకంపై తెరకెక్కుతున్న ఈ చిత్రానికి కేవీ కదిరవేలు దర్శకత్వం వహిస్తుండగా, ఏఎస్ రమణ బాలాజీ మరియు పద్మావతి గాంధీ సంయుక్తంగా నిర్మిస్తున్నారు. ఇప్పటికే ఈ సినిమాకు సంబంధించిన ప్రచార చిత్రాలు, ట్రైలర్‌కు ప్రేక్షకుల నుంచి అద్భుతమైన స్పందన లభించింది. ఈ నేపథ్యంలో సినిమా విడుదలకు తేదీ ఖరారు కావడంతో పాటు చిత్ర యూనిట్ ఘనంగా ఆడియో వేడుకను నిర్వహించింది.
ఈ సినిమాలో యోగిబాబు సింగారం అనే విభిన్నమైన పాత్రలో కనిపించబోతున్నారు. సమాజంలో నెలకొన్న అసమానతలు, సంచార జాతుల చరిత్ర అలాగే రాజకీయ అంశాలను మేళవించి దర్శకుడు ఈ కథను తెరకెక్కించారు. ఈ సినిమాకు శ్యాం సీఎస్ సంగీతం అందిస్తున్నారు. త్వరలోనే అంటే అక్టోబర్ 30న ప్రపంచవ్యాప్తంగా థియేటర్లలో ఈ చిత్రం విడుదల కానుంది. ఈ తరుణంలో చెన్నైలో నిర్వహించిన ఆడియో రిలీజ్ వేడుకకు కోలీవుడ్ ప్రముఖులు ముఖ్య అతితులుగా హాజరై చిత్ర యూనిట్‌ను అభినందించారు. ఈ కార్యక్రమంలో చిత్ర విశేషాలను పంచుకున్న దర్శకుడు, నటీనటులు సినిమాపై తమలో ఉన్న నమ్మకాన్ని వ్యక్తం చేశారు.
ఈ చిత్ర నిర్మాణం వెనుక విస్తృతమైన పరిశోధన ఉందని, కేవలం వినోదం మాత్రమే కాకుండా సామాజిక స్పృహ కలిగించేలా ఈ కథను రూపొందించామని దర్శకుడు కదిరవేలు వెల్లడించారు. కుటుంబ సమేతంగా థియేటర్లలో కూర్చుని చూడదగ్గ చక్కని చిత్రమిని ఆయన పేర్కొన్నారు. ఇక హీరో యోగిబాబు మాట్లాడుతూ తనకు ఈ చిత్రంలో అవకాశం ఇచ్చినందుకు ధన్యవాదాలు తెలుపుతూ, దివంగత నటులు మనోబాల, మారిముత్తులను ఈ సందర్భంగా గుర్తుచేసుకున్నారు. అక్టోబర్ 30న ప్రేక్షకుల ముందుకు రానున్న ఈ చిత్రం అన్ని వర్గాల ప్రేక్షకులను అలరిస్తుందని, అందరూ థియేటర్లలో సినిమాను ఆదరించి విజయవంతం చేయాలని ఆయన కోరారు.
