మానవాళి సమస్యలకు పరిష్కారాలు యువ ఆవిష్కర్తలు - మేరు ప్రావిణ్య 2026లో ప్రతిభ చాటిన విద్యార్థులు

 హైదరాబాద్ సిటీ బ్యూరో, మేజర్ న్యూస్ (నవంబర్ 6, 2026:* మేరు ఇంటర్నేషనల్ స్కూల్ ఆధ్వర్యంలో నిర్వహించిన వార్షిక ఎంటర్‌ప్రెన్యూర్‌షిప్ ఐడియాథాన్ ‘మేరు ప్రావిణ్య 2026’ విజయవంతంగా ముగిసింది. పాఠశాల ప్రతిష్టాత్మక కార్యక్రమం ఎం-క్లాప్ (మేరు కెరీర్, లీడర్‌షిప్ అండ్ లైఫ్ స్కిల్స్, అకడమిక్ ఎన్‌రిచ్‌మెంట్ ప్రోగ్రామ్)లో భాగంగా 5 నుంచి 12వ తరగతి విద్యార్థుల కోసం ఈ కార్యక్రమాన్ని నిర్వహించారు. ‘డిజైన్ ఫర్ హ్యుమానిటీ: ఇన్నోవేషన్స్ ఫర్ సర్వైవల్ ఇన్ వార్’ అనే ఇతివృత్తంతో హైదరాబాద్‌లోని రాయదుర్గ్ టి-హబ్‌లో జరిగిన ఈ కార్యక్రమంలో మియాపూర్, తెల్లాపూర్ క్యాంపస్‌ల విద్యార్థులు పాల్గొన్నారు.
ఈ ఏడాది దాదాపు 2,000 మంది విద్యార్థులు 375 వినూత్న ఆలోచనలను రూపొందించారు. వీరిలో 247 మంది విద్యార్థులతో కూడిన 66 జట్లు నాలుగు రోజుల పాటు జరిగిన సెమీఫైనల్ పోటీల్లో పాల్గొన్నాయి. పరిశ్రమలకు చెందిన నిపుణులు ఈ ఆలోచనలను పరిశీలించి గ్రాండ్ ఫినాలేకు జట్లను ఎంపిక చేశారు.
గ్రాండ్ ఫినాలేకు మేరు ఇంటర్నేషనల్ స్కూల్ వ్యవస్థాపకురాలు, డైరెక్టర్ మేఘన గోరుకంటి జూపల్లి, లెర్నియా.ఏఐ సహ వ్యవస్థాపకుడు, సీఈఓ చిరంజీవి మద్దాల, బోవర్ స్కూల్ ఆఫ్ ఎంటర్‌ప్రెన్యూర్‌షిప్ వైస్ ప్రెసిడెంట్ (సేల్స్ అండ్ ఎక్స్‌పాన్షన్) రాజీవ్ కుమార్ జ్యూరీ సభ్యులుగా హాజరయ్యారు. విద్యార్థుల తల్లిదండ్రులు, ఉపాధ్యాయులు, విద్యా రంగ ప్రముఖులు కూడా పాల్గొన్నారు.
ఈ సందర్భంగా మేరు ఇంటర్నేషనల్ స్కూల్ వ్యవస్థాపకురాలు, డైరెక్టర్ మేఘన గోరుకంటి జూపల్లి మాట్లాడుతూ, “ఎం-క్లాప్ కార్యక్రమాన్ని రూపొందించినప్పుడు విద్యార్థుల్లో ఎంటర్‌ప్రెన్యూర్‌షిప్ ఆలోచనా విధానం, ఆర్థిక అవగాహన, జీవిత నైపుణ్యాలను పెంపొందించాలనేది మా లక్ష్యం. వాస్తవ ప్రపంచంలోని సమస్యలను గుర్తించడం, ఆలోచనలకు కార్యరూపం ఇవ్వడం, బృందంగా పనిచేయడం, తమ ఆలోచనలకు బాధ్యత వహించడం వంటి అనుభవాలను వారికి అందించాలనుకున్నాం. మేరు ప్రావిణ్యలో విద్యార్థుల ప్రతిభ ద్వారా ఆ లక్ష్యం సాకారం కావడం ఎంతో సంతోషంగా ఉంది.
‘యుద్ధ పరిస్థితుల్లో మనుగడ కోసం ఆవిష్కరణలు’ అనే ఈ ఏడాది ఇతివృత్తం ద్వారా ఆహారం, నీరు, ఆశ్రయం, అత్యవసర సహాయం వంటి కనీస అవసరాలు అందుబాటులో లేని పరిస్థితుల్లో ప్రజలకు ఎలా తోడ్పడవచ్చో విద్యార్థులు ఆలోచించారు. సెర్చ్ అండ్ రెస్క్యూ రోబోట్ల నుంచి అత్యవసర పరిస్థితుల్లో ఆహార నిల్వలను పర్యవేక్షించే పరిష్కారాల వరకు అనేక ఆలోచనలను వారు రూపొందించారు. ఒక వినూత్న ఆలోచనను రూపొందించడం మాత్రమే కాకుండా, అది ఎవరికి ఉపయోగపడుతుంది, వారికి అందుబాటులో ఉంటుందా, ఆచరణలో ఎంతవరకు ఉపయోగకరంగా ఉంటుంది అనే అంశాలను కూడా పరిగణనలోకి తీసుకోవాలి. విద్యార్థులు ధైర్యంగా ఆలోచించి, తమ ఆలోచనలను పరీక్షిస్తూ, తాము సహాయం చేయాలనుకునే వ్యక్తుల అవసరాలను దృష్టిలో ఉంచుకుని ముందుకు సాగాలి” అని అన్నారు.
గ్రాండ్ ఫినాలేలో విద్యార్థులు యుద్ధ పరిస్థితుల్లో మనుగడ, రక్షణ, భద్రత, విద్య, మానవతా అవసరాలకు సంబంధించిన ప్రాజెక్టులు, నమూనాలను ప్రదర్శించారు. వివిధ విభాగాల్లో ప్రతిభ కనబరిచిన విజేతలకు అవార్డులు అందజేశారు.