ఓటర్ల తీర్పుపై సర్వత్రా ఉత్కంఠ! 69.21 శాతం ఓటింగ్ నమోదు

గోకవరం, మేజర్ న్యూస్ : తూర్పుగోదావరి జిల్లా గోకవరం మండలంలో జడ్పీటీసీ, ఎంపీటీసీ ఎన్నికల పోలింగ్ ప్రక్రియ ప్రశాంత వాతావరణంలో ముగిసింది. గురువారం ఉదయం 7 గంటలకు ప్రారంభమైన పోలింగ్ సాయంత్రం 5 గంటల వరకు కొనసాగింది.  మండలంలో మొత్తం 69.21 శాతం పోలింగ్ నమోదైనట్లు ఎన్నికల అధికారులు వెల్లడించారు. మండల వ్యాప్తంగా ఏర్పాటు చేసిన 61 పోలింగ్ కేంద్రాల్లో ఓటర్లు తమ ఓటు హక్కును వినియోగించుకున్నారు. మొత్తం 39,834 మంది ఓటర్లు తమ ఓటు హక్కును వినియోగించుకోగా, వారిలో 19,807 మంది పురుషులు, 20,027 మంది మహిళా ఓటర్లు ఉన్నారు.  ఉదయం నుంచే పలు పోలింగ్ కేంద్రాల వద్ద ఓటర్లు బారులు తీరి, ఉత్సాహంగా పోలింగ్ లో పాల్గొన్నారు. మహిళలు, పురుషులు పెద్ద సంఖ్యలో పోలింగ్ కేంద్రాలకు చేరుకుని తమ ఓటు హక్కును వినియోగించుకున్నారు. ఎన్నికల ప్రక్రియ సజావుగా సాగేందుకు అధికారులు అవసరమైన ఏర్పాట్లు చేపట్టారు. పోలీసు సిబ్బంది పోలింగ్ కేంద్రాల వద్ద భద్రతా చర్యలు చేపట్టారు. మండల వ్యాప్తంగా ఎక్కడా అవాంఛనీయ సంఘటనలు, గొడవలు చోటుచేసుకోకుండా పోలింగ్ ప్రశాంతంగా ముగిసిందని అధికారులు తెలిపారు. మొత్తం మీద గోకవరం మండలంలో జడ్పీటీసీ, ఎంపీటీసీ ఎన్నికల పోలింగ్ 69.21 శాతంతో ముగిసింది. బ్యాలెట్ బాక్స్ లను భద్రంగా స్ట్రాంగ్ రూములకు తరలించారు. ఓటర్ల తీర్పుపై మండలంలో సర్వత్రా ఉత్కంఠ నెలకొంది.