కడియం కంచుకోటపై ఎవరి జెండా? బుచ్చయ్య చౌదరి అభివృద్ధి వ్యూహం ఫలించేనా?
తాడాల చక్రవర్తి సేవలు భార్య రాజరాజేశ్వరికి విజయాన్ని అందించేనా?
కడియం, మేజర్ న్యూస్ :టీడీపీకి కంచుకోటగా పేరొందిన కడియం మండలంలో స్థానిక సంస్థల ఎన్నికల పోరు ఆసక్తికరంగా మారింది. గత ఆరు ఎన్నికల్లో నాలుగుసార్లు టీడీపీ విజయం సాధించగా, ఈసారి కూడా తన ఆధిపత్యాన్ని నిలబెట్టుకుంటుందా? లేక వైఎస్సార్‌సీపీ బోణీ కొడుతుందా? అన్న ఉత్కంఠ నెలకొంది.
కూటమి అభ్యర్థి బోడపాటి పుణ్యవతి విజయాన్ని ప్రతిష్టాత్మకంగా తీసుకున్న రాజమహేంద్రవరం రూరల్ ఎమ్మెల్యే గోరంట్ల బుచ్చయ్య చౌదరి మండలంలో విస్తృత ప్రచారం నిర్వహించారు. అభివృద్ధి కార్యక్రమాలు, పార్టీ బలాన్ని నమ్ముకుని ఆయన చేసిన ప్రయత్నాలు విజయాన్ని అందిస్తాయా? అన్నది చర్చనీయాంశంగా మారింది. మంత్రి కందుల దుర్గేష్ సైతం కూటమి అభ్యర్థుల తరఫున ప్రచారం నిర్వహించి మద్దతు కూడగట్టారు.
మరోవైపు వైసీపీ అభ్యర్థి తాడాల రాజరాజేశ్వరి గెలుపు కోసం మాజీ మంత్రి చెల్లుబోయిన వేణుగోపాలకృష్ణ, జక్కంపూడి రాజా, జక్కంపూడి గణేష్, ఆకుల వీర్రాజు, చందన నాగేశ్వరరావు, వైయస్సార్సీపి రాష్ట్ర కార్యదర్శి గిరిజాల బాబు తదితర నాయకులు ముమ్మర ప్రచారం చేశారు. ముఖ్యంగా ఆమె భర్త తాడాల విష్ణు చక్రవర్తి నిర్వహించిన సేవా కార్యక్రమాలు, ప్రజలతో ఉన్న అనుబంధం ఈ ఎన్నికల్లో ఎంతవరకు ప్రభావం చూపాయన్న ఆసక్తి నెలకొంది. ఆయన సేవలకు ప్రజల ఆదరణ లభించి రాజరాజేశ్వరికి విజయాన్ని అందిస్తుందా? అన్నది మరో ప్రశ్నగా మారింది.
ఒకవైపు బుచ్చయ్య చౌదరి రాజకీయ వ్యూహం, అభివృద్ధి ప్రయత్నాలు.. మరోవైపు తాడాల చక్రవర్తి ప్రజాసేవ, వైసీపీ నాయకుల ప్రచారం.. ఈ రెండింటి మధ్య ఓటరు ఎవరికి పట్టం కట్టాడన్నది ఇప్పుడు మండలవ్యాప్తంగా చర్చనీయాంశంగా మారింది.
