కౌంటింగ్ ఏర్పాట్లపై అధికారుల సమీక్ష.. సూపర్వైజర్లతో ఆర్‌ఓ, ఎంపీడీఓ సమావేశం.
అనపర్తి, మేజర్ న్యూస్:స్థానిక సంస్థల ఎన్నికల ఓట్ల లెక్కింపు ప్రక్రియకు సంబంధించి అధికారులు ముందస్తు చర్యలు చేపట్టారు. ఈ నేపథ్యంలో కౌంటింగ్ నిర్వహణకు నియమితులైన కౌంటింగ్ సూపర్వైజర్లతో రిటర్నింగ్ అధికారి (ఆర్‌ఓ), మండల పరిషత్ అభివృద్ధి అధికారి (ఎంపీడీఓ) అనపర్తి మండల పరిషత్ కార్యాలయంలో సమావేశం నిర్వహించారు. ఈ సమావేశంలో ఓట్ల లెక్కింపు ప్రక్రియకు సంబంధించి చేపట్టాల్సిన ఏర్పాట్లు, విధులు, బాధ్యతలపై సిబ్బందికి వివరించారు.కౌంటింగ్ సమయంలో ప్రతి అంశాన్ని జాగ్రత్తగా పరిశీలించాలని, ఎన్నికల సంఘం నిర్దేశించిన మార్గదర్శకాలను తప్పనిసరిగా పాటించాలని అధికారులు సూచించారు. ఓట్ల లెక్కింపులో ఎలాంటి పొరపాట్లకు తావులేకుండా అప్రమత్తంగా వ్యవహరించాలని తెలిపారు.
కౌంటింగ్ ప్రారంభం నుంచి ఫలితాల ప్రకటన వరకు ప్రతి దశలోనూ పారదర్శకత పాటించాలని స్పష్టం చేశారు.కౌంటింగ్ సూపర్వైజర్లు తమకు కేటాయించిన విధులను ముందుగానే పూర్తిగా అవగాహన చేసుకోవాలని, బ్యాలెట్ పత్రాల వర్గీకరణ, చెల్లుబాటు అయ్యే ఓట్లు, చెల్లని ఓట్ల గుర్తింపు, ఓట్ల లెక్కింపు, ఫలితాల నమోదు వంటి అంశాల్లో నిబంధనల ప్రకారం వ్యవహరించాలని సూచించారు. ఏదైనా సందేహం లేదా సమస్య తలెత్తితే సొంత నిర్ణయాలు తీసుకోకుండా వెంటనే సంబంధిత ఉన్నతాధికారుల దృష్టికి తీసుకురావాలని తెలిపారు.ఎన్నికల కౌంటింగ్ ప్రక్రియ ప్రశాంతంగా, సజావుగా పూర్తయ్యేలా ప్రతి ఒక్కరూ సమన్వయంతో పనిచేయాలని ఆర్‌ఓ ప్రేమ్ కుమార్, ఎంపీడీఓ రామకృష్ణారెడ్డి సూచించారు. కౌంటింగ్ విధుల్లో పాల్గొనే సిబ్బంది సమయపాలన పాటిస్తూ, తమకు అప్పగించిన బాధ్యతలను సమర్థవంతంగా నిర్వహించాలని పేర్కొన్నారు.
