లక్షెట్టిపేటలో యాచకుడి మృతి.. ఆచూకీ తెలపాలని పోలీసుల విజ్ఞప్తి

సూర్య, లక్షెట్టిపేట: పట్టణంలోని ఆంధ్ర బోర్ అశోక హోటల్ సమీపంలో గురువారం సాయంత్రం గుర్తుతెలియని వ్యక్తి మృతి చెందాడు. మృతుడి వయస్సు సుమారు 40 నుంచి 45 ఏళ్ల మధ్య ఉంటుందని పోలీసులు తెలిపారు. మృతుడు మాసిపోయిన గడ్డం, తల వెంట్రుకలతో పాటు బూడిద రంగు దుస్తులు ధరించి ఉన్నట్లు పేర్కొన్నారు. స్థానికుల సమాచారంతో సంఘటనా స్థలానికి చేరుకున్న పోలీసులు మృతదేహాన్ని లక్షెట్టిపేట ప్రభుత్వ ఆసుపత్రి మార్చురీకి తరలించారు. విచారణలో భాగంగా గత ఆరు నెలలుగా సదరు వ్యక్తి మతిస్థిమితం లేని స్థితిలో అదే ప్రాంతంలో తిరుగుతూ, హోటళ్ల వద్ద భిక్షాటన చేస్తూ, చెట్ల కింద నిద్రిస్తున్నట్లు స్థానికుల ద్వారా తెలిసిందని పోలీసులు వెల్లడించారు.

మృతుడి వివరాలు తెలిసినవారు లేదా అతని కుటుంబ సభ్యులు ఎవరైనా ఉంటే లక్షెట్టిపేట పోలీస్ స్టేషన్‌ను సంప్రదించాలని ఎస్సై గోపతి సురేష్ కోరారు.