నాంపల్లి ప్రజాప్రతినిధుల కోర్టుకు హాజరైన సీఎం రేవంత్ రెడ్డి

తెలంగాణ బ్యూరో ప్రతినిధి :‎  తెలంగాణ ముఖ్యమంత్రి రేవంత్ రెడ్డి గురువారం హైదరాబాద్ నాంపల్లిలోని ప్రజాప్రతినిధుల ప్రత్యేక కోర్టుకు హాజరయ్యారు. గత ప్రభుత్వ హయాంలో తనపై నమోదైన పాత కేసుల విచారణ ప్రక్రియలో భాగంగా ఆయన న్యాయస్థానం ఎదుట హాజరయ్యారు. 2021లో నాగార్జున సాగర్ శాసనసభ నియోజకవర్గానికి జరిగిన ఉపఎన్నికల ప్రచార సమయంలో కోవిడ్ నిబంధనలను ఉల్లంఘించారనే ఆరోపణలపై రేవంత్ రెడ్డిపై ఒక కేసు నమోదైంది. అప్పట్లో ఆయన తెలంగాణ ప్రదేశ్ కాంగ్రెస్ కమిటీ (టీపీసీసీ) అధ్యక్షుడిగా బాధ్యతలు నిర్వహిస్తున్నారు. ఆ సమయంలో, 2021 ఏప్రిల్ 11న నల్గొండ జిల్లా పెద్దవూర మండలంలోని చలకుర్తి గ్రామంలో నిర్వహించిన ఉపఎన్నిక ప్రచారంలో రేవంత్ రెడ్డి పాల్గొన్నారు. ఆ సందర్భంలో మాస్క్ ధరించలేదని, ఇతర కోవిడ్ నిబంధనలు పాటించలేదని ఆరోపిస్తూ పోలీసులు ఆయనపై కేసు నమోదు చేశారు. ఈ కేసు విచారణలో భాగంగా క్రిమినల్ ప్రొసీజర్ కోడ్ సెక్షన్ 313 కింద న్యాయస్థానం సీఎం రేవంత్ రెడ్డి స్టేట్‌మెంట్‌ను రికార్డు చేసింది.
గత ప్రభుత్వ హయాంలో ఎన్నికల ప్రవర్తనా నియమావళి (కోడ్), కోవిడ్ నిబంధనల ఉల్లంఘనకు సంబంధించి రేవంత్ రెడ్డిపై రాష్ట్రవ్యాప్తంగా పలు ప్రాంతాల్లో ఇలాంటి కేసులు నమోదయ్యాయి. ఇందులో భాగంగా 2026 ఫిబ్రవరి 28న కూడా గత ప్రభుత్వ కాలంలో నమోదైన ఏడు కేసులకు సంబంధించి ఆయన ప్రజాప్రతినిధుల కోర్టుకు హాజరయ్యారు. ఆ కేసులు ప్రధానంగా 2019 హుజూర్‌నగర్ ఉపఎన్నిక, 2021లో కోవిడ్ సమయంలో నిర్వహించిన బహిరంగ సభలకు సంబంధించినవి ఉన్నాయి . 2019 హుజూర్‌నగర్ ఉపఎన్నిక ప్రచారంలో కాంగ్రెస్ అభ్యర్థికి మద్దతుగా సుమారు 40 వాహనాలు, డీజే సౌండ్ సిస్టమ్‌లతో ర్యాలీ నిర్వహించారనే అభియోగాలపై రేవంత్ రెడ్డితో పాటు అప్పటి ఎంపీ నలమాద ఉత్తమ్ కుమార్ రెడ్డిపై కూడా కేసులు నమోదయ్యాయి. అయితే, హుజూర్‌నగర్ ఉపఎన్నికల కోడ్ ఉల్లంఘన ఆరోపణలపై నమోదైన ఒక క్రిమినల్ కేసును గతంలోనే తెలంగాణ హైకోర్టు కొట్టివేసింది. గరిడేపల్లి పోలీస్ స్టేషన్‌లో నమోదైన ఆ కేసులో రేవంత్ రెడ్డిని రెండో నిందితుడిగా (ఏ 2), అప్పటి ఎంపీ ఉత్తమ్ కుమార్ రెడ్డిని మొదటి నిందితుడిగా (ఏ 1) పేర్కొన్నారు. ఎన్నికల అధికారుల నుంచి ముందస్తు అనుమతి లేకుండా 2019 అక్టోబర్ 19న పోనుగోడు మండలంలో ప్రచార సభ నిర్వహించారంటూ పోలీసులు ఐపీసీ సెక్షన్ 188 కింద కేసు నమోదు చేసి, హైదరాబాద్‌లోని ఎక్సైజ్ కేసుల ప్రిన్సిపల్ స్పెషల్ జ్యుడిషియల్ ఫస్ట్ క్లాస్ మేజిస్ట్రేట్ కోర్టులో ఛార్జిషీట్ దాఖలు చేశారు. 
ఈ కేసుపై విచారణ జరిపిన హైకోర్టు, నిబంధనలను ఉద్దేశపూర్వకంగా ఉల్లంఘించినట్లు ఎలాంటి బలమైన ఆధారాలు ఛార్జిషీట్‌లో లేవని, ఈ కేసు చట్టపరంగా నిలబడదని స్పష్టం చేస్తూ కేసును కొట్టివేసింది. రేవంత్ రెడ్డి దాఖలు చేసిన క్వాష్ పిటిషన్‌పై హైకోర్టు ఈ మేరకు తీర్పునిచ్చింది. తాజాగా నాగార్జున సాగర్ ఉపఎన్నిక నాటి పాత కేసు విచారణలో భాగంగా సీఎం రేవంత్ రెడ్డి న్యాయస్థానానికి హాజరై తన వాంగ్మూలాన్ని నమోదు చేశారు.