బ్రహ్మాసముద్రం మండలం,ఎరిడికేరా సర్పంచ్ అభ్యర్థి గా గాజుల కుమార్ ఎన్నిక.

బ్రహ్మసముద్రం: మండలంలోని ఎర్రడికేర గ్రామ పంచాయతీ సర్పంచ్ అభ్యర్థిగా గాజుల కుమార్‌ను వైఎస్సార్ కాంగ్రెస్ పార్టీ నాయకులు ఏకాభిప్రాయంతో ఎంపిక చేశారు. కళ్యాణదుర్గం నియోజకవర్గ వైఎస్సార్‌సీపీ సమన్వయకర్త డాక్టర్ తలారి రంగయ్య ఆశీస్సులతో గ్రామంలో నిర్వహించిన సమావేశంలో పార్టీ నాయకులు, కార్యకర్తలు, అభిమానుల సమక్షంలో ఈ నిర్ణయం తీసుకున్నారు. రానున్న గ్రామ పంచాయతీ ఎన్నికల్లో పార్టీ తరఫున గాజుల కుమార్‌ను సర్పంచ్ అభ్యర్థిగా బరిలోకి దించాలని నిర్ణయించారు. ఈ సందర్భంగా నాయకులు మాట్లాడుతూ గ్రామాభివృద్ధికి కృషి చేసే నాయకత్వం అవసరమని, ప్రజల సమస్యలపై అవగాహన కలిగి గ్రామ ప్రజలకు అందుబాటులో ఉండే వ్యక్తిగా గాజుల కుమార్‌ను అభ్యర్థిగా ఎంపిక చేసినట్లు తెలిపారు. గ్రామంలో మౌలిక వసతుల కల్పన, తాగునీటి సమస్య పరిష్కారం, పారిశుద్ధ్యం, వీధి దీపాలు, రహదారుల అభివృద్ధి వంటి అంశాలకు ప్రాధాన్యత ఇవ్వాలని సూచించారు. ప్రజల సహకారంతో గ్రామాన్ని అభివృద్ధి పథంలో ముందుకు తీసుకెళ్లేందుకు కృషి చేయాలని ఆకాంక్షించారు. పార్టీ నాయకులు, కార్యకర్తలందరూ సమన్వయంతో పనిచేస్తూ పార్టీ బలోపేతానికి కృషి చేయాలని పిలుపునిచ్చారు. అభ్యర్థి ఎంపిక సందర్భంగా నాయకులు, కార్యకర్తలు గాజుల కుమార్‌కు శుభాకాంక్షలు తెలియజేశారు. ఈ కార్యక్రమంలో మండల కన్వీనర్ పాలబండ్ల చంద్రశేఖర్ రెడ్డి, మాజీ మండల డీలర్ల సంఘం అధ్యక్షుడు ఎర్రిస్వామి, గ్రామ అధ్యక్షుడు నజీర్, మాజీ సర్పంచ్ ఎల్లప్పతో పాటు వైఎస్సార్ కాంగ్రెస్ పార్టీ నాయకులు, కార్యకర్తలు, అభిమానులు పెద్ద సంఖ్యలో పాల్గొన్నారు.
కళ్యాణదుర్గం టౌన్ రిపోర్టర్ :- బోయ రంగస్వామి.