కూరగాయల సాగుతో అదనపు ఆదాయం ఆయిల్‌పామ్ తోటల్లో అంతర పంటల సాగుకు ప్రాధాన్యత ఇవ్వాలి
సూర్య – పెద్దపల్లి రూరల్ :
వాతావరణ మార్పులు, భూగర్భ జలాల తగ్గుదలను దృష్టిలో ఉంచుకొని రైతులు తక్కువ నీటి వినియోగంతో అధిక ఆదాయం ఇచ్చే కూరగాయల సాగుకు ప్రాధాన్యత ఇవ్వాలని జిల్లా ఉద్యానశాఖాధికారి గడ్డం శ్యామ్ ప్రసాద్ సూచించారు.
గురువారం పెద్దపల్లి మండలం హన్మంతునిపేటలో రైతు గౌరవెల్లి రవీందర్ రావుకు చెందిన 4.5 ఎకరాల ఆయిల్‌పామ్ తోటలో అంతర పంటలుగా సాగు చేస్తున్న టమాటా, మిరప పంటలను ఆయన పరిశీలించారు. ఈ సందర్భంగా మాట్లాడుతూ.. భూగర్భ జలాలు తగ్గుతున్న నేపథ్యంలో అధిక నీరు అవసరమయ్యే పంటలకు బదులుగా బెండ, అలసంద, గోరుచిక్కుడు వంటి కూరగాయలు సాగు చేయాలన్నారు. డ్రిప్ ఇరిగేషన్, మల్చింగ్ పద్ధతులతో టమాటా, పచ్చిమిర్చి, బీరకాయ, కాకరకాయ సాగు చేసి మంచి ఆదాయం పొందవచ్చన్నారు. ఈ పద్ధతులకు ప్రభుత్వం ఉద్యానశాఖ ద్వారా రాయితీలు అందిస్తోందని, రైతులు సద్వినియోగం చేసుకోవాలని కోరారు.
కార్యక్రమంలో ఉద్యాన విస్తరణ అధికారి రాము, రైతులు పాల్గొన్నారు.
