ఖైదీల సమస్యలు తెలుసుకున్న జిల్లా న్యాయసేవాధికార సంస్థ కార్యదర్శి

సిద్దిపేట, ; సిద్దిపేట జిల్లా జైలును జిల్లా న్యాయసేవాధికార సంస్థ కార్యదర్శి, సెక్రటరీ శ్రీమతి కె. సౌజన్య శుక్రవారం సందర్శించారు. తెలంగాణ రాష్ట్ర న్యాయసేవాధికార సంస్థ, హైదరాబాద్ ఆదేశాలు, సిద్దిపేట జిల్లా ప్రధాన న్యాయమూర్తి, జిల్లా న్యాయసేవాధికార సంస్థ ఛైర్మన్ జి. సుదర్శన్ సూచనల మేరకు ఆమె ఈ పర్యటన చేపట్టారు.ఈ సందర్భంగా జైలులోని ఖైదీలతో మాట్లాడి వారి సమస్యలు, యోగక్షేమాలను అడిగి తెలుసుకున్నారు. ఖైదీలకు అందిస్తున్న భోజన సౌకర్యాలు, వంటగది, నిల్వ గది, మరుగుదొడ్లను పరిశీలించారు. జైలులో ఖైదీలకు కల్పిస్తున్న సౌకర్యాలపై జైలు సూపరింటెండెంట్‌ను వివరాలు అడిగి తెలుసుకున్నారు.ఈ సందర్భంగా కె. సౌజన్య మాట్లాడుతూ ఖైదీలందరూ సత్ప్రవర్తనతో మెలగాలని సూచించారు. జైలులో ఉన్న ప్రతి ఒక్కరికీ న్యాయవాది ఉండాలని, న్యాయవాదులు లేని వారికి ఉచిత న్యాయసహాయం అందించేందుకు న్యాయసేవాధికార సంస్థ సిద్ధంగా ఉంటుందని తెలిపారు.న్యాయసహాయ రక్షణ న్యాయవాదులు ప్రతి వారం జిల్లా జైలును సందర్శిస్తారని, న్యాయవాదులు లేని ఖైదీలకు ఉచితంగా న్యాయసహాయం అందిస్తారని వివరించారు. ఖైదీలు తమకు ఉన్న న్యాయపరమైన సమస్యలను న్యాయసేవాధికార సంస్థ దృష్టికి తీసుకురావాలని సూచించారు.ఈ కార్యక్రమంలో జిల్లా జైలు సూపరింటెండెంట్ జి. రత్నం, డిప్యూటీ జైలర్ వి. వికాస్, సహాయ న్యాయసహాయ రక్షణ న్యాయవాది ఎం. రవికుమార్, న్యాయసేవాధికార సంస్థ సిబ్బంది పాల్గొన్నారు.