జనగణనను పకడ్బందీగా నిర్వహించండి

చిత్తూరు ప్రతినిధి మేజర్ న్యూస్: జనగణన–2027లో భాగంగా రెండో దశలో నిర్వహించనున్న జనాభా గణన ప్రక్రియను పకడ్బందీగా, సమర్థవంతంగా నిర్వహించేందుకు సంబంధిత అధికారులు, సిబ్బంది పూర్తి అవగాహనతో శిక్షణ పొందాలని డి ఆర్ ఓ 

 మోహన్ కుమార్ పేర్కొన్నారు.గురువారం స్థానిక కలెక్టరేట్లోని సమావేశం మందిరములో జిల్లా స్థాయి అధికారులకు ఈనెల 12 వ తేదీ నుంచి 14వ తేదీ వరకు మూడు రోజుల పాటు నిర్వహించనున్న శిక్షణ కార్యక్రమంలో డిఆర్ఓ ముఖ్యఅతిథిగా పాల్గొన్నారు, ఈ కార్యక్రమంలో ముని చంద్ర, లక్ష్మీ కళ, అధికారులు తదితరులు పాల్గొన్నారు.ఈ సందర్భంగా డిఆర్ఓ కే మోహన్ కుమార్ మాట్లాడుతూ జనగణన నిర్వహణపై మూడు రోజుల పాటు అందించే శిక్షణను అధికారులు, సిబ్బంది పూర్తిస్థాయిలో సద్వినియోగం చేసుకోవాలని సూచించారు. శిక్షణలో వివరించే ప్రతి అంశాన్ని శ్రద్ధగా విని, ముఖ్యమైన విషయాలను నోట్ చేసుకోవాలని, ఎలాంటి సందేహాలు ఉన్నా వెంటనే ప్రశ్నలను మాస్టర్ ట్రైనర్లను అడిగి నివృత్తి చేసుకోవాలని తెలిపారు. శిక్షణ పూర్తయ్యే సమయానికి ప్రతి ఒక్కరికీ జనాభా గణన ప్రక్రియపై పూర్తి అవగాహన ఉండాలని స్పష్టం చేశారు. ప్రజల ఇళ్లకు వెళ్లినప్పుడు చిరునవ్వుతో, స్నేహపూర్వకంగా మాట్లాడాలని, వారి సహకారాన్ని కోరాలని తెలిపారు. ప్రజలతో దురుసుగా వ్యవహరించకుండా, ఓపికగా వారి సందేహాలను నివృత్తి చేయాలని సూచించారు. ప్రజల సహకారం, అధికారుల సానుకూల వైఖరి జనగణన విజయవంతానికి దోహదపడతాయని పేర్కొన్నారు.ప్రస్తుతం 68 మంది ఫీల్డ్ ట్రైనర్లకు మూడు రోజుల పాటు శిక్షణ కొనసాగుతోందని, పంచాయతీ ఎన్నికల ప్రక్రియ డిసెంబర్ 3వ తేదీతో ముగియనున్న నేపథ్యంలో, డిసెంబర్ 5వ తేదీ తర్వాత ఈ ఫీల్డ్ ట్రైనర్ల ద్వారా జిల్లాలోని సూపర్వైజర్లు, ఎన్యూమరేటర్లకు క్షేత్రస్థాయిలో పూర్తిస్థాయి శిక్షణ అందజేస్తారు. గతంలో నిర్వహించిన హౌస్ లిస్టింగ్ ప్రక్రియలో తలెత్తిన ఖాళీ ఇళ్లు, మ్యాపింగ్ లోపాల వంటి సాంకేతిక సమస్యలను గత రెండు-మూడు నెలలుగా అధికారులు నిశితంగా పరిశీలించి 99.9 శాతం వరకు సరిదిద్దారు.జిల్లా పరిధిలో ఉన్న దాదాపు మూడు వేలకు పైగా హౌస్ లిస్టింగ్ బ్లాక్‌లను రాష్ట్ర స్థాయి ఆడిట్ ద్వారా క్షుణ్ణంగా తనిఖీ చేసి తుది గణనకు సిద్ధంగా ఉంచారు.భారతదేశంలో 1872 నుండి జనాభా గణన జరుగుతుండగా, 2027లో నిర్వహించేది దేశంలో 16వ దని స్వాతంత్య్రానంతరం 8వ జనాభా గణన అని అధికారులు వివరించారు. 150 ఏళ్ల చరిత్ర కలిగిన ఈ ప్రక్రియలో తొలిసారిగా పూర్తిస్థాయి డిజిటల్ మాధ్యమాలను వినియోగిస్తున్నారన్నారు. ఎన్యూమరేటర్లు తమ స్మార్ట్‌ఫోన్లలో ప్రత్యేక మొబైల్ యాప్‌ల సహాయంతో కుటుంబాల నుండి నేరుగా డేటాను సేకరిస్తారు. పౌరులు తమ వివరాలను ప్రత్యేక వెబ్ పోర్టల్ ద్వారా స్వయంగా నమోదు చేసుకునే వీలు కల్పించారు. అయితే, ఈ డేటా ఖచ్చితత్వాన్ని నిర్ధారించేందుకు ఎన్యూమరేటర్లు, సూపర్వైజర్ల క్షేత్రస్థాయి ధృవీకరణ తప్పనిసరిగా ఉంటుంది. పేర్కొన్నారు.ఈ కార్యక్రమంలో సంబంధిత అధికారుల తదితరులు పాల్గొన్నారు.

ఉమాశంకర్ చిత్తూరు స్టాఫ్ రిపోర్టర్.