సూర్య మానకొండూరు : మానకొండూరు మండలం ఖాదరగూడెం గ్రామంలో తెలంగాణ గ్రామీణ బ్యాంకు ఆధ్వర్యంలో సంపూర్ణ ఆర్థిక సేవల కార్యక్రమం, ఆర్థిక అక్షరాస్యతపై అవగాహన కార్యక్రమం నిర్వహించారు. ఈ సందర్భంగా బ్యాంకు మేనేజర్ ముదిగంటి ప్రవీణ్ రెడ్డి మాట్లాడుతూ అర్హులైన ప్రతి కుటుంబానికి బ్యాంకింగ్ సేవలు, ప్రభుత్వ సంక్షేమ పథకాలు, బీమా, సామాజిక భద్రతా పథకాలను అందించడమే కార్యక్రమ ప్రధాన ఉద్దేశమన్నారు. ప్రధానమంత్రి జీవన్ జ్యోతి బీమా యోజన (PMJJBY), ప్రధానమంత్రి సురక్ష బీమా యోజన (PMSBY), అటల్ పెన్షన్ యోజన (APY) పథకాలపై వివరించి, అర్హులను నమోదు చేశారు. బ్యాంకు ఖాతాల కేవైసీ, నిరుపయోగంగా ఉన్న ఖాతాల పునరుద్ధరణ, పెన్షన్ పథకాలపై అవగాహన కల్పించారు. ఆర్థిక అక్షరాస్యత కౌన్సిలర్ కాయితం క్రాంతి సైబర్ నేరాలు, ఆన్లైన్ మోసాల నివారణకు తీసుకోవాల్సిన జాగ్రత్తలను వివరించారు. కార్యక్రమంలో గ్రామ సర్పంచ్ అక్షయ, ఉప సర్పంచ్ శ్రీలత, బ్యాంకు సిబ్బంది క్రాంతి, కౌన్సిలర్ తొర్తి శ్రీనివాస్, గ్రామపంచాయతీ సిబ్బంది తదితరులు పాల్గొన్నారు.