కార్మిక సమస్యల పరిష్కారంలో యాజమాన్యం నిర్లక్ష్యం తగదు - సీఐటీయూ నేత అల్లి రాజేందర్

సూర్య, మందమర్రి : సింగరేణి కార్మికులు ఎదుర్కొంటున్న సమస్యల పరిష్కారంలో యాజమాన్యం అనుసరిస్తున్న నిర్లక్ష్య వైఖరి సరికాదని సింగరేణి కాలరీస్ ఎంప్లాయీస్ యూనియన్ (సీఐటీయూ) ఉప ప్రధాన కార్యదర్శి అల్లి రాజేందర్ విమర్శించారు. ఆదివారం పట్టణంలోని యూనియన్ కార్యాలయంలో నిర్వహించిన సమావేశంలో ఆయన మాట్లాడుతూ కార్మికుల సమస్యలను పరిష్కరించడంలో యాజమాన్యంతో పాటు గుర్తింపు సంఘాలుగా కొనసాగుతున్న సంఘాలు కూడా బాధ్యతగా వ్యవహరించడం లేదని ఆవేదన వ్యక్తం చేశారు. కార్మికులకు సకాలంలో అందించాల్సిన పనిముట్లు, చలికాలంలో ఇవ్వాల్సిన గరం కోట్లు ఇప్పటికీ పంపిణీ చేయకపోవడం, యాక్టింగ్ ప్యానెల్ జాబితాలను గనుల వద్ద ప్రదర్శించకపోవడం యాజమాన్య నిర్లక్ష్యానికి నిదర్శనమన్నారు. గత ఆర్థిక సంవత్సరంలో కార్మికుల వేతనాల నుంచి రికవరీ చేసిన సీఎంపీఎఫ్ సొమ్ము వారి ఖాతాల్లో జమైందో లేదో స్పష్టత లేకపోవడంపై బాధ్యత ఎవరిదని ప్రశ్నించారు. ఫిల్టర్ బెడ్ల వద్ద రాత్రి వేళల్లో భద్రతా సిబ్బందిని నియమించాలని, సోలార్ ఫెన్సింగ్ ఏర్పాటు చేయాలని గతంలోనే యాజమాన్యానికి వినతిపత్రం సమర్పించినా పట్టించుకోలేదన్నారు. ఫలితంగా గత నెల రోజుల్లో రెండుసార్లు దొంగతనాలు జరిగాయని పేర్కొన్నారు. ఇప్పటికైనా స్పందించి ఫిల్టర్ బెడ్ల చుట్టూ ఎత్తైన ప్రహరీ గోడలు నిర్మించడంతో పాటు సోలార్ ఫెన్సింగ్ ఏర్పాటు చేసి, పూర్తిస్థాయిలో సెక్యూరిటీ సిబ్బందిని నియమించాలని డిమాండ్ చేశారు. సింగరేణి వ్యాప్తంగా సెక్యూరిటీ, జూనియర్ అసిస్టెంట్ పోస్టుల్లో ఏర్పడిన ఖాళీలను జనరల్ అసిస్టెంట్లతో తాత్కాలికంగా భర్తీ చేస్తూ కాలయాపన చేయకుండా పూర్తిస్థాయి నియామకాలు చేపట్టాలని కోరారు. లేబర్ కమిషనర్ నిర్వహించిన గుర్తింపు సంఘాల ఎన్నికల రెండేళ్ల కాలపరిమితి ముగిసిన నేపథ్యంలో యాజమాన్యం అన్ని యూనియన్లను సమానంగా గుర్తించి వ్యవహరించాలని సూచించారు. కొంతమంది నాయకులను జనరల్ షిఫ్టుల్లో వారి విధులకు సంబంధం లేని ఇతర పనుల్లో కొనసాగించడం వల్ల సాధారణ కార్మికులపై పని భారం పడుతోందన్నారు. ఈ పరిస్థితులతో కార్మికులు విధులు సక్రమంగా నిర్వహించలేక డ్యూటీలకు గైర్హాజరవుతున్నారని తెలిపారు. యాజమాన్యం ఇప్పటికైనా కార్మికుల సమస్యలపై దృష్టి సారించి తక్షణ చర్యలు చేపట్టాలని అల్లి రాజేందర్ డిమాండ్ చేశారు. ఈ కార్యక్రమంలో జడల ప్రవీణ్, భద్రి ఆదర్శ్, భేతి భరత్, చైతన్య తదితరులు పాల్గొన్నారు.