కాచిగూడ–కృష్ణా రైలులో అపరిశుభ్రత తాండవం.. ప్రయాణికులకు కనీస టాయిలెట్ సౌకర్యాలు కరువు!

                 రైల్వే అధికారుల నిర్లక్ష్యానికి ప్రయాణికులు తీవ్ర ఇబ్బందులు – ఉన్నతాధికారులు తక్షణమే స్పందించాలి

కాచిగూడ నుంచి కృష్ణా వైపు వెళ్లే రాయిచుర్ ఎక్సప్రెస్ రైలులో ప్రయాణిస్తున్న సమయంలో రైల్వే కోచ్‌లలో నెలకొన్న అపరిశుభ్ర పరిస్థితులు ప్రయాణికులను తీవ్ర ఇబ్బందులకు గురిచేస్తున్నాయి. ముఖ్యంగా రైలు టాయిలెట్లు అత్యంత దారుణంగా ఉండటంతో పాటు, కనీస పరిశుభ్రత కూడా పాటించకపోవడం రైల్వే శాఖ నిర్వహణ తీరుపై అనేక ప్రశ్నలు లేవనెత్తుతోంది.

టాయిలెట్లలో పేరుకుపోయిన మురికి, దుర్వాసన, అపరిశుభ్ర వాతావరణం చూస్తుంటే ప్రయాణికుల ఆరోగ్యం పట్ల రైల్వే అధికారులకు ఎంతమాత్రం బాధ్యత ఉందో అర్థమవుతోంది. ప్రయాణికుల నుంచి టికెట్ ఛార్జీలు వసూలు చేస్తున్న రైల్వే శాఖ, వారికి కనీస సౌకర్యాలు కల్పించడంలో ఎందుకు విఫలమవుతోంది?

రైల్వే ప్రయాణం సామాన్య ప్రజలకు ఎంతో ముఖ్యమైన రవాణా సౌకర్యం. మహిళలు, వృద్ధులు, చిన్నపిల్లలు ప్రయాణించే రైళ్లలో కనీసం శుభ్రమైన టాయిలెట్లు కూడా అందుబాటులో లేకపోవడం బాధాకరం. ప్రయాణికుల సౌకర్యాల కోసం నిధులు ఖర్చు చేస్తున్నామని చెప్పే అధికారులు క్షేత్రస్థాయిలో కోచ్‌ల పరిస్థితులను ఎందుకు పరిశీలించడం లేదు?

రైల్వే ఉన్నతాధికారులకు మా డిమాండ్లు :

. కాచిగూడ–కృష్ణా మార్గంలో నడిచే రైళ్లలో తక్షణమే పారిశుధ్య తనిఖీలు నిర్వహించాలి.

. ప్రతి కోచ్‌లో టాయిలెట్లను నిరంతరం శుభ్రం చేసే విధంగా ప్రత్యేక సిబ్బందిని నియమించాలి.
. ప్రయాణికులకు పరిశుభ్రమైన నీరు, మరుగుదొడ్లు, కనీస మౌలిక సదుపాయాలు కల్పించాలి.
. విధుల పట్ల నిర్లక్ష్యం వహిస్తున్న సంబంధిత అధికారులపై విచారణ జరిపి తగిన చర్యలు తీసుకోవాలి.

ప్రజలకు మెరుగైన రవాణా సౌకర్యాలు కల్పించడం రైల్వే శాఖ బాధ్యత. ప్రయాణికుల టికెట్ డబ్బులు తీసుకోవడమే కాదు, వారికి కనీస గౌరవం, పరిశుభ్రత, సౌకర్యాలు కల్పించాలి.*రైల్వే శాఖ ఉన్నతాధికారులు ఇప్పటికైనా స్పందించి ఈ సమస్యను తక్షణమే పరిష్కరించాలని, లేనిపక్షంలో ప్రయాణికుల తరఫున ఈ సమస్యను సంబంధిత అధికారుల దృష్టికి మరింత బలంగా తీసుకెళ్తామని కోరుతున్నాము.