ఇల్లందు రామ్‌దేవ్ బాబా మందిరంలో ఘనంగా బతుకమ్మ వేడుకలు
సూర్య,ఇల్లందు తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ పండుగ వేడుకలు ఇల్లందు పట్టణంలోని రామ్‌దేవ్ బాబా ఆలయం, మార్వాడి సత్రం ప్రాంగణంలో కమిటీ చైర్మన్ సునీల్ తోతుల, ప్రధాన కార్యదర్శి నారాయణదాసులాహుటి లా ఆధ్వర్యంలో ఘనంగా నిర్వహించారు. తెలంగాణ ఆడపడుచుల ఆత్మీయతకు, ప్రకృతిపై వారికున్న ప్రేమకు ప్రతిరూపంగా నిలిచే బతుకమ్మ సంబరాలు భక్తి, ఆనందోత్సాహాల మధ్య కొనసాగాయి. ఈ వేడుకలతో ఆలయ ప్రాంగణం పండుగ శోభను సంతరించుకుంది.
తెలంగాణ రాష్ట్ర ప్రత్యేకతను ప్రపంచానికి చాటిచెప్పే పండుగల్లో బతుకమ్మకు విశిష్ట స్థానం ఉంది. ప్రకృతిలో లభించే వివిధ రకాల రంగురంగుల పూలను సేకరించి, వాటిని అందంగా పేర్చి బతుకమ్మను రూపొందించడం ఈ పండుగ ప్రత్యేకత. పూలనే దేవతా స్వరూపంగా భావించి పూజించడం తెలంగాణ ప్రజల ప్రకృతి ఆరాధనకు నిదర్శనం. తరతరాలుగా వస్తున్న ఈ సంప్రదాయం నేటికీ అదే ఉత్సాహంతో కొనసాగుతోంది.
ఇల్లందు పట్టణంలోని రామ్‌దేవ్ బాబా ఆలయం మార్వాడి సత్రంలో నిర్వహించిన బతుకమ్మ వేడుకల్లో మహిళలు సంప్రదాయ దుస్తులు ధరించి, రంగురంగుల పూలతో అందంగా అలంకరించిన బతుకమ్మలను తీసుకొచ్చారు. వాటిని ఒకచోట ఏర్పాటు చేసి భక్తిశ్రద్ధలతో పూజలు నిర్వహించారు. అనంతరం బతుకమ్మల చుట్టూ చేరి సంప్రదాయ పాటలు పాడుతూ, చప్పట్లు కొడుతూ ఉత్సాహంగా నృత్యాలు చేశారు. మహిళల ఆటపాటలతో ఆ ప్రాంతమంతా సందడిగా మారింది.
చిన్నారులు సైతం వేడుకల్లో పాల్గొని బతుకమ్మ ఆటలను ఆసక్తిగా తిలకించారు. పెద్దలు సంప్రదాయాలను వివరిస్తూ, భావితరాలకు వాటి విశిష్టతను తెలియజేశారు.
ఇల్లందు పట్టణంలోనూ బతుకమ్మ పండుగకు ప్రజలు విశేష ప్రాధాన్యం ఇస్తున్నారు. పండుగ సందర్భంగా ఆలయాలు, వివిధ సామాజిక వేదికలు వేడుకలకు కేంద్రాలుగా మారుతున్నాయి. రామ్‌దేవ్ బాబా ఆలయం మార్వాడి సత్రంలో నిర్వహించిన ఈ బతుకమ్మ కార్యక్రమానికి ఆలయ కమిటీ చైర్మన్ సునీల్ తొత్ల , ప్రధాన కార్యదర్శి నారాయణదాసు లహుటి ఆధ్వర్యంలో ఘనంగా జరిగాయి.
సూర్య రిపోర్టర్ రాజేష్ ఇల్లందు
