అప్పుల భారం-ఎండిన వరి పంట!

*--రూ.80 వేల పెట్టుబడి బూడిదపాలు!* 

*--ఎండిన మూడు ఎకరాల పంట* 

*--పెట్టుబడి ఎలా తీర్చాలి? రైతుకు కన్నీటి కష్టాలు* 

నవాబుపేట సూర్య న్యూస్: పంట చేతికొస్తే అప్పులు తీరి కుటుంబానికి ఆసరాగా ఉంటుందని ఆశించిన ఆ రైతుకు నిరాశే మిగిలింది.ఆరుగాలం కష్టపడి సాగు చేసిన వరి పంట కళ్ల ముందే ఎండిపోవడంతో రైతు కాట్రావత్ జములమ్మ ఆవేదన చెందుతోంది.మండలంలోని పుట్టోనిపల్లి తాండ పరిధిలోని కొత్తకుంట తాండలో ఈ పరిస్థితి నెలకొంది.రైతు జములమ్మ దాదాపు రూ.80వేల అప్పు తెచ్చి మూడు ఎకరాల్లో వరి నాట్లు వేసింది.బోరులో పుష్కలంగా నీరు ఉండటంతో పంట దిగుబడిపై ఆశలు పెట్టుకుంది.అయితే ఎల్‌నినో ప్రభావంతో భూగర్భ జలాలు తగ్గిపోవడం,మరోవైపు విద్యుత్ కోతల కారణంగా పంటకు సకాలంలో నీరు అందలేదు.దీంతో మూడు ఎకరాల్లో వరి పంట పూర్తిగా ఎండిపోయింది.ఒకవైపు చేతికందని పంట,మరోవైపు అప్పుల భారం.దీంతో అప్పులు ఎలా తీర్చాలి?కుటుంబాన్ని ఎలా పోషించాలి?అనే ఆందోళన రైతును వెంటాడుతోంది.విత్తనాలు,ఎరువులు,కూలీల ఖర్చులతో పాటు సాగు కోసం చేసిన అప్పుల భారం పెరిగిపోవడంతో దిక్కుతోచని పరిస్థితి నెలకొంది.పంటను కాపాడుకునేందుకు నీటి కోసం ఎదురుచూసినా పరిస్థితులు అనుకూలించకపోవడంతో తీవ్ర నష్టాన్ని చవిచూడాల్సి వచ్చింది.శ్రమించి పంట సాగు చేసినా ప్రకృతి పరిస్థితులు,విద్యుత్ కోతలతో నష్టపోవాల్సి రావడంపై రైతు ఆవేదన వ్యక్తం చేస్తోంది.అధికారులు క్షేత్రస్థాయిలో పంట నష్టాన్ని పరిశీలించి ప్రభుత్వానికి నివేదించాలని,నష్టపోయిన రైతుకు అప్పుల ఊబిలో కూరుకుపోకుండా ప్రభుత్వం తగిన పరిహారం అందించి ఆదుకోవాలని రైతు ఆశగా ఎదురుచూస్తోంది.