పెంచలకోనలో వైభవంగా శరన్నవరాత్రి ఉత్సవాలు

నెల్లూరు కల్చరల్, రాపూరు మేజర్ న్యూస్   :  శ్రీ పొట్టిశ్రీరాములు నెల్లూరు జిల్లా, రాపూరు మండలంలోని ప్రముఖ పుణ్యక్షేత్రమైన పెంచలకోనలో ఆదిలక్ష్మి అమ్మవారి శరన్నవరాత్రి ఉత్సవాలు అత్యంత వైభవంగా కొనసాగుతున్నాయి. ఉత్సవాలలో భాగంగా తొమ్మిదవ రోజైన సోమవారం అమ్మవారికి ప్రత్యేక పూజా కార్యక్రమాలు నిర్వహించారు. ఉదయం అమ్మవారికి ప్రత్యేక పుష్పాలంకరణ చేసి, 10 గంటలకు స్నపన తిరుమంజనం శాస్త్రోక్తంగా జరిపించారు.సాయంత్రం ప్రత్యేక పుష్పాలంకరణ అనంతరం, 6 గంటలకు ఆదిలక్ష్మి అమ్మవారు 'ధనలక్ష్మి' అలంకారంలో పద్మపీఠంపై కొలువై భక్తులకు దర్శనమిచ్చారు. ప్రధానార్చకులు, అర్చకులు, వేదపండితుల మంత్రోచ్ఛారణలు, మంగళ వాయిద్యాల నడుమ అమ్మవారి ప్రాకారోత్సవం కన్నుల పండువగా సాగింది. తదుపరి సామూహిక కుంకుమార్చన కార్యక్రమాన్ని భక్తిశ్రద్ధలతో నిర్వహించినట్లు ఆలయ ఉపకమీషనరు, కార్యనిర్వహణాధికారి కోవూరు జనార్థన్ రెడ్డి తెలిపారు. పెంచలకోన ఆలయ అభివృద్ధికి, అన్నదాన పథకానికి సోమవారం ఓ భక్తుడు రూ. 2 లక్షల విరాళాన్ని అందజేశారు. మర్రిపాడు మండలం, భీమవరం గ్రామానికి చెందిన మూలి వెంకటేశ్వర రెడ్డి కుమారుడు మూలి మాధవ రెడ్డి.. ఆలయ నిత్యాన్నదాన పథకానికి రూ. 1,00,000, ఆదిలక్ష్మి అమ్మవారి ఆలయ పునఃనిర్మాణానికి మరో రూ. 1,00,000 నగదును విరాళంగా సమర్పించారు.