గంజాయి సాగు, రవాణాను అరికట్టాలి జిల్లా కలెక్టర్ కె.హరిత

సూర్య ఆసిఫాబాద్ జిల్లా ప్రతినిధి ఆసిఫాబాద్ జిల్లాలో మాదక ద్రవ్యాల రవాణా, గంజాయి సాగు, రవాణాను అరికట్టాలని జిల్లా కలెక్టర్ కె.హరిత అన్నారు. గురువారం జిల్లా కేంద్రంలోని సమీకృత జిల్లా కలెక్టరేట్ భవన సమావేశ మందిరంలో ఎన్ కార్ మాదకద్రవ్యాలను నియంత్రణపై నిర్వహించిన సమావేశానికి జిల్లా ఎస్.పి. నితికాపంత్, జిల్లా అదనపు కలెక్టర్ (స్థానిక సంస్థలు) యువరాజ్ మర్మాట్, కాగజ్ నగర్ సబ్ కలెక్టర్ హర్ష చౌదరి ఆసిఫాబాద్ రాజస్వ మండల అధికారి లోకేశ్వర్ రావు లతో కలిసి హాజరై సంబంధిత అధికారులతో సమీక్ష నిర్వహించారు. ఈ సందర్భంగా జిల్లా కలెక్టర్ మాట్లాడుతూ జిల్లాలో మాదక ద్రవ్యాల రవాణా, గంజాయి సాగు, రవాణా అరికట్టడంలో అధికారులు సమన్వయంతో కృషి చేయాలని తెలిపారు. మాదకద్రవ్యాల నివారణపై ప్రత్యేక దృష్టి సారిస్తూ సాగు, రవాణాకు సంబంధించిన వ్యక్తులపై కఠిన చర్యలు తీసుకోవాలని తెలిపారు. ప్రభుత్వ పాఠశాలలు, కళాశాలలు, సంక్షేమ వసతి గృహాలలో విద్యార్థులకు మాదక ద్రవ్యాలు తీసుకోవడం వల్ల కలిగే నష్టాలను వివరించాలని తెలిపారు. హోటళ్ళు, దాబా లలో తనిఖీలు చేపట్టాలని, మందుల షాపులలో నిషేధిత, అధిక మోతాదు మందులను పరిశీలించాలని తెలిపారు. వైద్య ఆరోగ్యశాఖ ఆధ్వర్యంలో గ్రామాలలో ప్రజలకు అవగాహన కార్యక్రమాలు నిర్వహించాలని, నషా ముక్త్ భారత్ అభియాన్ లో భాగంగా పాఠశాలలు, కళాశాలలో అవగాహన సదస్సులు నిర్వహించి తంబాకు రహిత విద్యాసంస్థలుగా మార్చాలని తెలిపారు.