గూగుల్‌పై అమెరికా ప్రభుత్వం సంచలన వ్యాజ్యం
సూర్య అంతర్జాతీయ డెస్క్: టెక్ దిగ్గజం గూగుల్ (Google) సంస్థపై అమెరికా న్యాయశాఖ ఫెడరల్ కోర్టులో కేసు నమోదు చేసింది. సైనిక సేవల కోసం సుదీర్ఘ కాలం పాటు విధులకు దూరంగా ఉండి తిరిగి వచ్చిన ఒక మాజీ ఉద్యోగికి, నిబంధనల ప్రకారం తగిన హోదా లేదా సమానమైన ఉద్యోగాన్ని కల్పించడంలో గూగుల్ విఫలమైందని ఆరోపిస్తూ ఈ దావా వేసింది. అమెరికా సైన్యంలో రిజర్విస్ట్‌గా పనిచేస్తున్న మార్క్ డేవిసన్ (Mark Davisson) అనే ఉద్యోగి పట్ల కంపెనీ నిబంధనలకు విరుద్ధంగా వ్యవహరించిందని, ఇది చట్టాన్ని ఉల్లంఘించడమేనని అధికారులు స్పష్టం చేశారు.
యూనిఫామ్డ్ సర్వీసెస్ ఎంప్లాయ్‌మెంట్ అండ్ రీఎంప్లాయ్‌మెంట్ రైట్స్ యాక్ట్ (USERRA) నిబంధనల ప్రకారం.. మిలిటరీ సర్వీస్ లేదా డిప్లాయ్‌మెంట్ ముగించుకుని తిరిగి వచ్చే సర్వీస్‌మెన్‌లకు వారు గతంలో నిర్వహించిన హోదాతో సమానమైన బాధ్యతలు, వృద్ధి అవకాశాలు కల్పించడం యజమానుల బాధ్యత. అయితే, అమెరికా ఆర్మీ సైబర్ కమాండ్‌లో సేవలు అందించి తిరిగి వచ్చిన మార్క్ డేవిసన్‌కు గూగుల్ పూర్వపు ఖాతాల నిర్వహణ బాధ్యతలను అప్పగించకపోగా, వేరే విభాగానికి మార్చి చివరకు తొలగించిందని దావాలో పేర్కొన్నారు.
దేశం కోసం ప్రాణాలను అర్పించే సైనికులు మరియు రిజర్విస్టులు సివిలియన్ రంగంలోకి తిరిగి వచ్చాక ఎలాంటి వివక్షను లేదా నష్టాన్ని ఎదుర్కొనేలా కంపెనీలు వ్యవహరించకూడదని న్యూయార్క్ మాన్‌హాటన్ యూఎస్ అటార్నీ కార్యాలయం హెచ్చరించింది. సైనిక ఉద్యోగుల హక్కుల పరిరక్షణే లక్ష్యంగా ఈ వ్యాజ్యాన్ని దాఖలు చేసినట్లు వెల్లడించారు. బాధితుడికి నష్టపరిహారంతో పాటు కోల్పోయిన వేతనాలు చెల్లించాలని, గూగుల్ కార్యాలయాల్లో ఫెడరల్ చట్టాలపై మరింత మెరుగైన శిక్షణ ఉండేలా చర్యలు తీసుకోవాలని న్యాయస్థానాన్ని కోరినట్లు అధికారులు తెలిపారు.
