గణేష్పూర్లో పోలీసుల భారీ దాడి - అక్రమ తవ్వకాలపై 15 మందిపై కేసు, 9 మంది అరెస్ట్, 2 స్టోన్ కటింగ్ మిషన్లు స్వాధీనం
నార్కల్;గణేష్పూర్ గ్రామంలో తరచూ అక్రమ తవ్వకాలు జరుపుతూ ప్రజలను భయాందోళనలకు గురిచేస్తున్న వారిపై పోలీసులు ఎట్టకేలకు కొరడా ఝుళిపించారు.నిమ్స్ అధికారుల ఫిర్యాదు మేరకు పోలీసులు చర్యలు చేపట్టారు. అక్రమ తవ్వకాలకు పాల్పడుతున్నారన్న ఆరోపణలపై మొత్తం 15 మందిపై కేసు నమోదు చేయడం జరిగింది.జహీరాబాద్ డీఎస్పీ గారు మరియు జహీరాబాద్ రూరల్ సర్కిల్ సిఐ గారి ఆధ్వర్యంలో, ఎస్ఐ మరియు సిబ్బంది గణేష్పూర్ గని ప్రదేశంలో ఆకస్మికంగా రైడ్ నిర్వహించారు.ఈ రైడ్లో పోలీసులు 9 మంది వ్యక్తులను అరెస్ట్ చేసి, అక్రమ తవ్వకాలకు ఉపయోగిస్తున్న 2 స్టోన్ కటింగ్ మిషన్లను స్వాధీనం చేసుకున్నారు.ఈ విషయాన్ని సిఐ జహీరాబాద్ రూరల్ సర్కిల్ తెలియజేశారు. ఆయన మాట్లాడుతూ - "గణేష్పూర్ గ్రామంలో ఎవరైనా అక్రమంగా, చట్టవ్యతిరేకంగా తవ్వకాలు జరిపినా, గని ప్రదేశంలో అక్రమ కార్యకలాపాలు చేసినా చర్యలు తప్పవు. చట్టప్రకారం కఠినంగా శిక్షిస్తాం. గ్రామంలో శాంతిభద్రతలకు భంగం కలిగించే వారిని ఎవరినీ వదిలిపెట్టం" అని గట్టిగా హెచ్చరించారు.పోలీసుల ఈ భారీ దాడితో గణేష్పూర్ గ్రామంలో అక్రమ తవ్వకాలకు పాల్పడే వారిలో తీవ్ర భయం మొదలైంది. ఇన్ని రోజులుగా భయంతో బతుకుతున్న గ్రామ ప్రజలు పోలీసుల చర్యను స్వాగతిస్తున్నారు."ఇలా రైడ్ చేసి అరెస్ట్ చేస్తేనే గ్రామంలో ప్రశాంతత వస్తుంది. పోలీసులకు మా ధన్యవాదాలు. ఇకపై ఎవరూ అక్రమ తవ్వకాలు చేయకుండా చూడాలి" అని గ్రామస్తులు అన్నారు.గ్రామంలో శాంతిభద్రతలు కాపాడటానికి పోలీసులు నిరంతరం నిఘా ఉంచుతామని, అక్రమ కార్యకలాపాలపై ఇలాంటి దాడులు కొనసాగుతాయని సిఐ గారు స్పష్టం చేశారు.