డ్రంక్ అండ్ డ్రైవ్పై అశ్వారావుపేట పోలీసుల అవగాహన.. తాగి బండి నడిపితే కఠిన చర్యలు
*సూర్య,అశ్వారావుపేట :* అశ్వారావుపేట పోలీస్ స్టేషన్ పరిధిలో ఎస్ఐ దేవ్ సింగ్ ఆధ్వర్యంలో డ్రంక్ అండ్ డ్రైవ్ తనిఖీలు నిర్వహించారు.
ఈ తనిఖీల సందర్భంగా మద్యం సేవించి వాహనాలు నడుపుతున్న వాహనదారులను గుర్తించి, వారికి రోడ్డు భద్రతపై అవగాహన కల్పించారు.
ఈ సందర్భంగా ఎస్ఐ దేవ్ సింగ్ మాట్లాడుతూ.. మద్యం సేవించి వాహనాలు నడపడం చట్టరీత్యా నేరమన్నారు. అజాగ్రత్త డ్రైవింగ్ వల్ల రోడ్డు ప్రమాదాలు జరిగి ప్రాణనష్టం సంభవించే ప్రమాదం ఉందని హెచ్చరించారు.
ప్రతి ఒక్కరూ ట్రాఫిక్ నిబంధనలు తప్పనిసరిగా పాటించాలని, మద్యం సేవించి ఎట్టి పరిస్థితుల్లోనూ వాహనాలు నడపకూడదని సూచించారు. ప్రజల ప్రాణ రక్షణే పోలీసుల ప్రధాన లక్ష్యమని, రోడ్డు భద్రత విషయంలో ప్రతి ఒక్కరూ బాధ్యతాయుతంగా వ్యవహరించాలని కోరారు.
రాబోయే రోజుల్లో కూడా డ్రంక్ అండ్ డ్రైవ్ తనిఖీలు కొనసాగుతాయని, నిబంధనలు ఉల్లంఘించిన వారిపై చట్ట ప్రకారం కఠిన చర్యలు తీసుకుంటామని పోలీసులు తెలిపారు.
సూర్య రిపోర్టర్ మునీర్ ఆర్ సి అశ్వరావుపేట