డబుల్ బెడ్‌రూమ్ ఇళ్ల పంపిణీలో అవకతవకలపై సమగ్ర విచారణ జరిపించాలి లాటరీ ద్వారా ఎంపికైన అర్హులైన లబ్ధిదారులకే ఇళ్లు కేటాయించాలి – ఆర్డీఓకు కౌన్సిలర్ల వినతి
డబుల్ బెడ్‌రూమ్ ఇళ్ల పంపిణీలో అవకతవకలపై సమగ్ర విచారణ జరిపించాలి
లాటరీ ద్వారా ఎంపికైన అర్హులైన లబ్ధిదారులకే ఇళ్లు కేటాయించాలి – ఆర్డీఓకు కౌన్సిలర్ల వినతి
మిర్యాలగూడ అర్బన్, మేజర్ న్యూస్:
మిర్యాలగూడ పట్టణంలో డబుల్ బెడ్‌రూమ్ ఇళ్ల పంపిణీలో జరిగినట్లు ఆరోపణలు వస్తున్న అవకతవకలపై సమగ్ర విచారణ జరిపించి, అర్హులైన పేదలకు న్యాయం చేయాలని కోరుతూ పలువురు మున్సిపల్ కౌన్సిలర్లు శనివారం రెవెన్యూ డివిజనల్ అధికారి (ఆర్డీఓ)కు వినతిపత్రం సమర్పించారు.
ఈ సందర్భంగా కౌన్సిలర్లు మాట్లాడుతూ.. 2017లో అప్పటి ప్రభుత్వం మిర్యాలగూడ పట్టణంలో మొత్తం 565 డబుల్ బెడ్‌రూమ్ ఇళ్ల నిర్మాణం చేపట్టిందని తెలిపారు. వీటిలో 40 ఇళ్లను కేటాయించగా, మిగిలిన 525 ఇళ్లకు సంబంధించి 48వ వార్డులో గ్రామసభలు నిర్వహించి, ప్రజల సమక్షంలో లాటరీ పద్ధతిలో లబ్ధిదారులను ఎంపిక చేసినట్లు వివరించారు.
అయితే 2023లో కాంగ్రెస్ ప్రభుత్వం అధికారంలోకి వచ్చిన అనంతరం ఇళ్ల పంపిణీ ప్రక్రియలో మార్పులు చోటుచేసుకున్నాయని ఆరోపించారు. గతంలో లాటరీ ద్వారా ఎంపికైన అర్హులైన లబ్ధిదారులను అనధికారికంగా జాబితా నుంచి తొలగించి, అధికార పార్టీకి చెందిన వారికి 245 ఇళ్లను కేటాయించినట్లు ఆరోపణలు ఉన్నాయని పేర్కొన్నారు.
ఈ వ్యవహారంపై సంబంధిత అధికారులు పూర్తిస్థాయిలో విచారణ జరిపించాలని, గతంలో లాటరీ ద్వారా ఎంపికైన 245 మంది అర్హులైన లబ్ధిదారులకు న్యాయం చేయాలని కోరారు. ప్రభుత్వ నిబంధనల ప్రకారం పారదర్శకంగా లాటరీ ద్వారా ఎంపికైన అర్హులకే డబుల్ బెడ్‌రూమ్ ఇళ్లను కేటాయించాలని ఆర్డీఓకు విజ్ఞప్తి చేశారు.
వినతిపత్రం సమర్పించిన వారిలో టీఆర్ఎస్ మున్సిపల్ ఫ్లోర్ లీడర్ ఎండీ ఇలియాస్ ఖాన్, కౌన్సిలర్లు పెద్ది శ్రీనివాస్ గౌడ్, గంగుల భిక్షం, వడ్డేపల్లి శ్రీనివాస్, గుడిసె దుర్గాప్రసాద్ తదితరులు ఉన్నారు.
