telangana
డబిల్‌పూర్‌లో భూ రీ సర్వే పనుల పరిశీలన.. అధికారులకు అదనపు కలెక్టర్ విజయేందర్ రెడ్డి సూచనలు
మేడ్చల్, మేజర్ న్యూస్: ప్రభుత్వం ప్రతిష్టాత్మకంగా చేపట్టిన భూ రీ సర్వే ప్రక్రియలో భాగంగా గురువారం మేడ్చల్–మల్కాజిగిరి జిల్లా మేడ్చల్ మండలంలోని డబిల్‌పూర్ గ్రామంలో జిల్లా అదనపు కలెక్టర్ విజయేందర్ రెడ్డి పర్యటించి సర్వే పనులను పరిశీలించారు. క్షేత్రస్థాయిలో భూముల వివరాల నమోదు, సర్వే నిర్వహణ తీరును పరిశీలించి సంబంధిత అధికారులకు పలు సూచనలు చేశారు.ఈ సందర్భంగా మండల తహసీల్దార్ భూపాల్ భూ రీ సర్వే ప్రక్రియకు సంబంధించిన వివరాలను అదనపు కలెక్టర్‌కు వివరించారు. రైతుల పాస్‌బుక్‌లో నమోదైన భూ ఆధార్ నంబర్ ఆధారంగా ఆన్‌లైన్‌లో భూమి లొకేషన్‌ను గుర్తించి సర్వే నిర్వహిస్తున్నట్లు తెలిపారు. అనంతరం సర్వే జరుగుతున్న ప్రాంతాన్ని పరిశీలించిన అదనపు కలెక్టర్ రైతులతో మాట్లాడి వారి అభిప్రాయాలను తెలుసుకున్నారు. సర్వే బృందానికి అవసరమైన సూచనలు అందించారు.భూ రీ సర్వే ద్వారా భూముల స్థానం, విస్తీర్ణం, సరిహద్దులు, రికార్డుల్లోని వివరాలను క్షేత్రస్థాయిలో పరిశీలించి డిజిటల్ రికార్డులతో అనుసంధానం చేయడం కీలకమని పేర్కొన్నారు. భూముల వివరాల్లో వ్యత్యాసాలను గుర్తించడం, భూ రికార్డులను మరింత పారదర్శకంగా నిర్వహించడం ఈ ప్రక్రియ ప్రధాన ఉద్దేశమని తెలిపారు. భూ వివాదాల పరిష్కారం, రికార్డుల సవరణ వంటి అంశాలు సంబంధిత నిబంధనలు, అధికారుల పరిశీలన ఆధారంగా చేపట్టనున్నట్లు వివరించారు.ఈ కార్యక్రమంలో ఏడీ ఎస్ఎల్ఆర్ శ్రీనివాసులు, ఆర్ఐ కుమార్, సర్వే బృందం సభ్యులు, రైతులు తదితరులు పాల్గొన్నారు.
