డాక్టర్‌ సురేందర్‌నాథ్‌ రెడ్డి విజయ ప్రస్థానం
వైద్య నిర్ధారణ రంగంలో నాణ్యత, విశ్వసనీయతకు ప్రాధాన్యమిస్తూ డాక్టర్‌ సురేందర్‌నాథ్‌ రెడ్డి సాగిస్తున్న ప్రస్థానం ప్రత్యేక గుర్తింపు పొందింది. 1981లో హైదరాబాద్‌లో ఒకే కేంద్రంతో ప్రారంభమైన విజయ డయాగ్నోస్టిక్స్‌.. నేడు ఏడు రాష్ట్రాల్లోని 30 నగరాల్లో సుమారు 170 కేంద్రాలకు విస్తరించింది. ఏటా కోటి మందికి పైగా వినియోగదారులకు సేవలందిస్తోంది. రోగులకు అవసరమైన వైద్య పరీక్షలను ఒకే చోట అందుబాటులోకి తీసుకురావాలన్న లక్ష్యంతో ప్రారంభమైన ఈ సంస్థ.. ఆధునిక వైద్య పరికరాలు, నిపుణుల సేవలు, నాణ్యమైన పరీక్షలు, అందుబాటు ధరలతో అభివృద్ధి చెందింది. సంస్థ వృద్ధిలో ఉద్యోగులను భాగస్వాములను చేస్తూ 400 మందికి పైగా ఉద్యోగులకు కంపెనీలో వాటాలు కల్పించడం డాక్టర్‌ రెడ్డి ప్రత్యేకతగా నిలిచింది. వ్యాపార విస్తరణతోపాటు వైద్య రంగంలో కొత్త వ్యాపారవేత్తలను ప్రోత్సహించడం, బాలికల విద్య, ప్రభుత్వ పాఠశాలల అభివృద్ధికి సహకరించడం ద్వారా సామాజిక బాధ్యతను కూడా కొనసాగిస్తున్నారు. ఒకే కేంద్రంతో మొదలైన ప్రయాణాన్ని దేశవ్యాప్తంగా విస్తరించిన విజయ డయాగ్నోస్టిక్స్‌ ప్రస్థానంలో నాణ్యత, నిబద్ధత, ఉద్యోగుల భాగస్వామ్యం, సామాజిక సేవ కీలక పాత్ర పోషిస్తున్నాయి.
ఎ.రవీందర్‌ తెలంగాణ బ్యూరో ప్రతినిధి
