బాసరలో అలరించిన అష్టావధానం

సూర్య భైంసా;బాసరలోని శివయోగి నిర్మల అంబయ్య సిద్ధాంతి సిద్ధాశ్రమం, సరస్వతీ స్తూపం, కోటి పార్థివలింగ స్తూపంతో కూడిన ద్వాదశ జ్యోతిర్లింగ మందిరంలో ఆదివారం అష్టావధాన కార్యక్రమం ఘనంగా నిర్వహించారు. తెలంగాణ తెలుగు కళానిలయం ఆధ్వర్యంలో, నిర్మల్‌కు చెందిన అంబికానాథ శర్మ సౌజన్యంతో ప్రముఖ కవులు కడారి దశరథ్, పీసర శ్రీనివాస్ గౌడ్ నేతృత్వంలో ఈ కార్యక్రమం జరిగింది.ఈ అష్టావధాన కార్యక్రమానికి బానావత్ నితిన్ నాయక్ అవధానిగా వ్యవహరించారు. నిషిద్ధాక్షరిలో కోవెల శ్రీనివాసాచార్యులు (విశ్రాంత ప్రధానోపాధ్యాయులు), సమస్యాపూరణలో కడారి దశరథ్ (తెలుగు ఉపాధ్యాయులు), దత్తపదిలో జాదవ్ పుండలీక్ రావు పాటిల్ (తెలుగు ఉపాధ్యాయులు, జీడీఆర్ కృష్ణ మల్టీ స్పెషాలిటీ అకౌంటెంట్), వర్ణనలో పీసర శ్రీనివాస్ గౌడ్ (సీనియర్ జర్నలిస్ట్),ఛందోభాషణంలో బొందిడి పురుషోత్తమరావు (విశ్రాంత ఉపాధ్యాయులు), ఆశువులో పడిగెల దేవీదాస్ (తెలుగు ఉపాధ్యాయులు),అప్రస్తుత ప్రసంగంలో గంగుల చిన్నన్న (సీనియర్ తెలుగు ఉపాధ్యాయులు)  న్యాస్తాక్షరిలో కృష్ణ కూడా పాల్గొన్నారు.ఈ సందర్భంగా అవధాని తన సాహితీ ప్రతిభతో వివిధ అంశాలకు సమయస్ఫూర్తితో సమాధానాలు అందించి సభికులను ఆకట్టుకున్నారు. కార్యక్రమానికి తెలుగు పండితులు, భాషాభిమానులు, కవులు అధిక సంఖ్యలో హాజరయ్యారు.