అంగన్‌వాడీ టీచర్ల నియామకాలకు ఇంటర్వ్యూల తేదీలు ఖరారు
రంగారెడ్డి : రంగారెడ్డి జిల్లాలో అంగన్‌వాడీ టీచర్ల నియామక ప్రక్రియలో భాగంగా ఇంటర్వ్యూల నిర్వహణకు తేదీలు ఖరారయ్యాయి. జిల్లా కలెక్టర్ ఆదేశాల మేరకు సర్టిఫికెట్ల పరిశీలనలో అర్హత సాధించిన అభ్యర్థుల్లో ప్రతి అంగన్‌వాడీ కేంద్రానికి మెరిట్ ప్రాతిపదికన 1:3 నిష్పత్తిలో ముగ్గురు అభ్యర్థులను ఇంటర్వ్యూలకు ఎంపిక చేశారు.
జిల్లా కలెక్టర్ సమక్షంలో రంగారెడ్డి జిల్లా కలెక్టరేట్‌లో ఈ ఇంటర్వ్యూలు నిర్వహించనున్నారు. ఈ నెల 13న చేవెళ్ల, ఇబ్రహీంపట్నం డివిజన్ల అభ్యర్థులకు, 14న కందుకూరు, రాజేంద్రనగర్ డివిజన్ల అభ్యర్థులకు, 16న షాద్‌నగర్ డివిజన్ అభ్యర్థులకు ఇంటర్వ్యూలు నిర్వహించనున్నట్లు జిల్లా మహిళా, శిశు సంక్షేమ శాఖ అధికారి శాంతి శ్రీ బుధవారం ఒక ప్రకటనలో తెలిపారు.
సంబంధిత ప్రాజెక్టుల సీడీపీవోలు ఇంటర్వ్యూకు ఎంపికైన అభ్యర్థులకు వ్యక్తిగతంగా సమాచారం అందజేస్తారని పేర్కొన్నారు. ఎంపికైన అభ్యర్థులందరూ తమకు కేటాయించిన తేదీన నిర్ణీత సమయానికి రంగారెడ్డి జిల్లా కలెక్టరేట్ కార్యాలయంలో అవసరమైన ధ్రువపత్రాలతో హాజరుకావాలని సూచించారు.
వడ్ల శ్రీనివాస చారి, రంగారెడ్డి - మేజర్ న్యూస్
