విద్యార్థులకు నాణ్యమైన భోజనం అందించాలి గురుకుల విద్యార్థినులతో కలిసి భోజనం చేసిన కలెక్టర్

సూర్య – పెద్దపల్లి

గురుకుల పాఠశాలల్లో విద్యార్థులకు నాణ్యమైన, పోషక విలువలతో కూడిన భోజనం అందించాలని కలెక్టర్ కోయ శ్రీహర్ష ఆదేశించారు. గురువారం పెద్దపల్లి పట్టణంలోని రంగంపల్లి మహాత్మ జ్యోతిబాపూలే బీసీ గురుకుల బాలికల పాఠశాల, జూనియర్ కళాశాలను ఆకస్మికంగా తనిఖీ చేశారు. పాఠశాల తరగతి గదులు, వంటశాల, భోజనశాల, వసతి గృహాలను పరిశీలించి విద్యార్థినులతో కలిసి భోజనం చేశారు. ఈ సందర్భంగా విద్యార్థినులతో మాట్లాడి విద్య, వసతి, భోజన సదుపాయాలపై వివరాలు అడిగి తెలుసుకున్నారు. మెనూ ప్రకారం పరిశుభ్రమైన, నాణ్యమైన ఆహారం అందించాలని నిర్వాహకులను ఆదేశించారు. విద్యార్థినులు క్రమశిక్షణతో చదువుకుని ఉన్నత స్థాయికి ఎదగాలని సూచించారు. ఈ కార్యక్రమంలో పాఠశాల ప్రిన్సిపాల్ మణిదీప్తి, ఉపాధ్యాయులు పాల్గొన్నారు.