పంచాయతీ ఎన్నికలు ప్రశాంతంగా, పారదర్శకంగా నిర్వహించాలి

                               అధికారులకు ప్రత్యేక అధికారి నక్కా మూర్తి దిశానిర్దేశం

కడియం, మేజర్ న్యూస్,:కడియం మండలంలో జరగనున్న గ్రామ పంచాయతీ ఎన్నికలను ప్రశాంత వాతావరణంలో, పారదర్శకంగా నిర్వహించేందుకు అధికారులు సమన్వయంతో పనిచేయాలని మండల ప్రత్యేక అధికారి నక్కా ఎన్.వి.వి.ఎస్. మూర్తి సూచించారు.
గురువారం కడియం మండల ప్రజా పరిషత్ కార్యాలయ సమావేశ మందిరంలో పంచాయతీ ఎన్నికల నిర్వహణపై సమీక్ష సమావేశం నిర్వహించారు. ఈ సమావేశానికి మండల ప్రత్యేక అధికారి, పీడీ (టూరిజం) నక్కా ఎన్.వి.వి.ఎస్. మూర్తి హాజరై జోనల్ అధికారులు, రూట్ అధికారులకు ఎన్నికల ఏర్పాట్లపై పలు సూచనలు చేశారు. ఎన్నికల ప్రక్రియలో ఎలాంటి ఆటంకాలు తలెత్తకుండా ముందస్తు జాగ్రత్తలు తీసుకోవాలని, విధుల్లో నిర్లక్ష్యం వహించకుండా ప్రతి ఒక్కరూ తమకు కేటాయించిన బాధ్యతలను సమర్థవంతంగా నిర్వర్తించాలని ఆదేశించారు. ఎన్నికలు స్వేచ్ఛాయుతంగా, సజావుగా జరిగేలా అన్ని శాఖల అధికారులు పరస్పర సమన్వయంతో వ్యవహరించాలని స్పష్టం చేశారు.
ఈ సమావేశంలో ఎంపీడీవో కె. రమేష్, తహసీల్దార్ ఎం. శ్రీనివాస్, సీఐ ఎ. వెంకటేశ్వరరావు, వివిధ శాఖల మండల స్థాయి అధికారులు, పంచాయతీ కార్యదర్శులు, జోనల్, రూట్ అధికారులు పాల్గొన్నారు.