నర్సరీ రైతు మార్గాని సత్యనారాయణకు యూనియన్ బ్యాంక్ పురస్కారం

                  ఉత్తమ రైతుగా ఎంపిక చేసి ఘన సన్మానం.. నర్సరీ రంగంలో విశేష కృషికి గుర్తింపు

కడియం మేజర్ న్యూస్ :నర్సరీ రంగంలో విశేష ప్రతిభ కనబరుస్తూ మొక్కల పెంపకంలో ప్రత్యేక గుర్తింపు పొందిన కడియం మండలం కడియపులంకకు చెందిన వీర హనుమాన్ నర్సరీ రైతు మార్గాని సత్యనారాయణకు అరుదైన గౌరవం లభించింది. నర్సరీ రంగానికి ఆయన అందిస్తున్న సేవలను గుర్తించిన యూనియన్ బ్యాంక్ ఆఫ్ ఇండియా ఉత్తమ రైతుగా ఎంపిక చేసి ఘనంగా సత్కరించింది.యూనియన్ బ్యాంక్ 108వ వ్యవస్థాపక దినోత్సవాన్ని పురస్కరించుకుని బుధవారం రాజమహేంద్రవరంలోని జేకే గార్డెన్స్‌లో నిర్వహించిన ప్రత్యేక కార్యక్రమంలో మార్గాని సత్యనారాయణను ఘనంగా సన్మానించి ప్రశంసాపత్రం అందజేశారు. మొక్కల పెంపకాన్ని వృత్తిగా ఎంచుకుని, నర్సరీ రంగం అభివృద్ధికి కృషి చేస్తూ వ్యవసాయ అనుబంధ రంగంలో తనదైన ముద్ర వేసిన ఆయన సేవలకు ఈ పురస్కారం గుర్తింపుగా నిలిచింది.
ఈ కార్యక్రమంలో యూనియన్ బ్యాంక్ రీజినల్ మేనేజర్ ఏ. విశ్వేశ్వరరావు, కడియం యూనియన్ బ్యాంక్ చీఫ్ మేనేజర్ ఆర్. సుభాష్, రీజినల్ కార్యాలయ సిబ్బంది తదితరులు పాల్గొన్నారు. కడియం ప్రాంతానికి చెందిన నర్సరీ రైతుకు ప్రముఖ బ్యాంకింగ్ సంస్థ నుంచి ఈ గౌరవం లభించడంపై స్థానిక నర్సరీ రైతులు హర్షం వ్యక్తం చేశారు.