యాసంగిలో వరికి బదులు ప్రత్యామ్నాయ పంటలు సాగు చేయాలి ఎస్సారెస్పీ నుంచి సాగునీరు విడుదల సాధ్యం కాదు : కలెక్టర్

సూర్య – పెద్దపల్లి

జిల్లాలో తక్కువ వర్షపాతం, ఎస్సారెస్పీ ప్రాజెక్టులో నీటిమట్టం తగ్గిన నేపథ్యంలో యాసంగిలో రైతులు వరి సాగు చేయవద్దని, ప్రత్యామ్నాయ పంటల వైపు దృష్టి సారించాలని కలెక్టర్ కోయ శ్రీహర్ష సూచించారు. గురువారం సమీకృత కలెక్టరేట్‌లో వ్యవసాయ శాఖ అధికారులతో యాసంగి సాగుపై సమీక్ష నిర్వహించారు. ఎస్సారెస్పీలో ప్రస్తుతం ఉన్న నీరు తాగునీటి అవసరాలకే సరిపోతుందని, యాసంగికి సాగునీరు విడుదల చేసే అవకాశం లేదని స్పష్టం చేశారు. వరి సాగు చేస్తే నీటి, విద్యుత్ కొరతతో పంటలు ఎండిపోయి రైతులు నష్టపోయే ప్రమాదం ఉందన్నారు. ఒక ఎకరం వరికి వినియోగించే నీటితో నాలుగు ఎకరాల్లో మొక్కజొన్న సాగు చేయవచ్చని తెలిపారు. రైతులు మొక్కజొన్నతో పాటు ఇతర ఆరుతడి పంటలను సాగు చేసేలా రైతు వేదికల్లో అవగాహన కల్పించాలని అధికారులను ఆదేశించారు. సమావేశంలో జిల్లా వ్యవసాయ శాఖ అధికారి శ్రీనివాస్, ఉద్యానవన శాఖ అధికారి ప్రసాద్ తదితరులు పాల్గొన్నారు.