యువతి అదృశ్యం.. చేవెళ్ల పోలీసుల దర్యాప్తు

• భర్త ఫిర్యాదుతో కేసు నమోదు

చేవెళ్ల పోలీస్‌స్టేషన్ పరిధిలోని ఎన్‌కేపల్లి గ్రామంలో 22 ఏళ్ల వివాహిత మహిళ అదృశ్యమైన ఘటనపై పోలీసులు కేసు నమోదు చేశారు. పోలీసుల వివరాల ప్రకారం.. ఎన్‌కేపల్లి గ్రామానికి చెందిన కొలగళ్ల సుధాకర్ కూలీగా పనిచేస్తున్నాడు. ఈ నెల 4న ఉదయం పనికి వెళ్లిన సుధాకర్ రాత్రి 9 గంటలకు ఇంటికి తిరిగి వచ్చేసరికి భార్య శిరీష ఇంట్లో కనిపించలేదు.

ఆమె కోసం చుట్టుపక్కల ప్రాంతాలు, బంధువులు, తెలిసిన ప్రదేశాల్లో వెతికినా ఆచూకీ లభించలేదు. ఈ క్రమంలో ఈ నెల 6న ఎర్లపల్లి గ్రామ ఉపసర్పంచ్ దయాకర్ సుధాకర్‌కు ఫోన్ చేసి, శిరీష తనకు ఫోన్ చేసి ఇకపై భర్తతో వైవాహిక జీవితం కొనసాగించనని తెలిపినట్లు సమాచారం ఇచ్చాడు.

తన భార్య అదృశ్యానికి ఎర్లపల్లి గ్రామానికి చెందిన తన మేనత్త కుమారుడు గణేష్‌పై అనుమానం ఉందని సుధాకర్ పోలీసులకు ఫిర్యాదు చేశాడు. దీంతో చేవెళ్ల పోలీసులు Cr.No.685/2026 U/h Woman Missing కింద కేసు నమోదు చేసి దర్యాప్తు చేపట్టారు.

అదృశ్యమైన శిరీష వయస్సు 22 సంవత్సరాలు, ఎత్తు సుమారు 5.2 అడుగులు, గోధుమ వర్ణం, తెలుగు మాట్లాడగలదు. అదృశ్యమైన సమయంలో ఆరెంజ్ రంగు చీర ధరించి ఉన్నట్లు పోలీసులు తెలిపారు. ఆమె ఆచూకీ తెలిసిన వారు వెంటనే చేవెళ్ల పోలీస్‌స్టేషన్‌కు సమాచారం అందించాలని పోలీసులు కోరారు.

( చేవెళ్ల - మేజర్ న్యూస్)