యాసంగిలో వరి సాగు తగ్గించండి

సూర్య ప్రధాన ప్రతినిధి, హైదరాబాద్ :రాష్ట్రంలో ఎల్‌నినో ప్రభావం, తాగు, సాగునీటి ఎద్దడిని ఎదుర్కొనేందుకు రైతులు, ప్రజలు ప్రభుత్వానికి అండగా నిలవాలని సీఎం రేవంత్‌ రెడ్డి విజ్ఞప్తి చేశారు. రాబోయే పది నెలలపాటు అందరూ అత్యంత అప్రమత్తంగా ఉండాలని, ఉన్న నీళ్లను పొదుపుగా వాడుకోవాలని సూచించారు. కొందామన్నా నీళ్లు కొనుగోలు చేసే పరిస్థితి లేదని స్పష్టం చేసిన ఆయన, రైతులు ఎవరో చెప్పే మాటలు నమ్మవద్దని, ఈ యాసంగిలో వరి పంట వేయకండి అని కోరారు. సాధ్యమైనంతవరకు యాసంగి పంటను తగ్గించి, ఒక సీజన్ పంటను వాయిదా వేసుకోవాలని విజ్ఞప్తి చేశారు. పంట వేయని కారణంగా ఉపాధి కోల్పోయే రైతు కూలీలకు ఉపాధి హామీ పథకం ద్వారా పనులు కల్పిస్తామని, పంట సాగు చేయని రైతులను కేంద్ర ప్రభుత్వం కూడా ఆదుకోవాలని ఆయన డిమాండ్ చేశారు. ఇదే సమయంలో రాష్ట్రానికి అదనపు విద్యుత్‌ను సబ్సిడీ ధరకు అందించాలని కేంద్రాన్ని కోరారు. కొన్ని వర్గాలు ట్రాన్స్‌ఫార్మర్లు కాలిపోతే పైశాచిక ఆనందం పొందుతున్నాయని సీఎం రేవంత్‌ రెడ్డి తీవ్ర స్థాయిలో విమర్శించారు.