విద్యాలక్ష్మి అలంకారంలో ఆదిలక్ష్మి అమ్మవారు

నెల్లూరు కల్చరల్/ రాపూరు మేజర్ న్యూస్ 
శ్రీ పొట్టి శ్రీరాములు నెల్లూరు జిల్లా, రాపూరు మండలంలోని ప్రముఖ పుణ్యక్షేత్రమైన పెంచలకోనలో శుక్రవారం శ్రీ పెనుశిల లక్ష్మీ నరసింహ స్వామికి అన్నకూటోత్సవం (తిరుప్పావడ సేవ) అత్యంత వైభవంగా నిర్వహించారు. ఉదయం ఆలయ ప్రధానార్చకులు, వేదపండితుల మంత్రోచ్ఛారణలు, మంగళ వాయిద్యాల నడుమ ఈ సేవను కన్నులపండువగా జరిపించారు.
ఈ సందర్భంగా ఆలయ ఉప కమీషనర్, కార్యనిర్వహణాధికారి కోవూరు జనార్ధన రెడ్డి మాట్లాడుతూ.. ఆలయంలో ప్రతి శుక్రవారం అన్నకూటోత్సవం నిర్వహిస్తున్నట్లు తెలిపారు. భక్తులు రూ. 500 చెల్లించి ఈ సేవలో పాల్గొనవచ్చని, సేవలో పాల్గొన్న భక్తులకు గోత్రనామాలతో అర్చన చేసి స్వామి వారి తీర్థ ప్రసాదాలతో పాటు ఒక కేజీ పులిహోర అందజేయనున్నట్లు పేర్కొన్నారు. ఉత్సవాల్లో భాగంగా ఆరో రోజైన శుక్రవారం శ్రీ పెనుశిల లక్ష్మీ నరసింహ స్వామి వారి పట్టమహిషి ఆదిలక్ష్మి అమ్మవారికి ప్రత్యేక పూజలు నిర్వహించారు. ఉదయం అమ్మవారికి పట్టువస్త్ర సమర్పణ, ప్రత్యేక పుష్పాలంకరణ గావించి, ఉదయం 10 గంటలకు స్నపన తిరుమంజనం జరిపించారు. సాయంత్రం  ప్రత్యేక పుష్పాలంకరణ, సామూహిక కుంకుమార్చన నిర్వహించగా, ఆదిలక్ష్మి అమ్మవారు 'విద్యాలక్ష్మి' అలంకారంలో పద్మ పీఠంపై కొలువుదీరి ప్రాకారోత్సవంలో భక్తులకు దర్శనమిచ్చారు. ఆదిలక్ష్మి అమ్మవారి శరన్నవరాత్రి ఉత్సవాల నేపథ్యంలో ఈరోజు సాయంత్రం నిర్వహించే సహస్ర దీపాలంకరణ సేవను రద్దు చేసినట్లు ఆలయ ఈవో కోవూరు జనార్ధన రెడ్డి ఒక ప్రకటనలో తెలిపారు.