కిమ్స్ హాస్పిటల్లో ఘనంగా ప్రపంచ అనస్థీషియా దినోత్సవ వేడుకలు

నెల్లూరు కల్చరల్ మేజర్ న్యూస్ 
నెల్లూరులోని కిమ్స్ ఆసుపత్రిలో శుక్రవారం ప్రపంచ అనస్థీషియా దినోత్సవ వేడుకలను ఘనంగా నిర్వహించారు. అనస్థీషియా వైద్యశాస్త్రం యొక్క ప్రాముఖ్యతను వివరించడం, రోగుల భద్రతలో అనస్థీషియా వైద్యులు పోషించే కీలక పాత్రను తెలియజేయడం, నాణ్యమైన వైద్య సేవలపై ప్రజల్లో అవగాహన పెంపొందించడం ప్రధాన లక్ష్యంగా ఈ కార్యక్రమాన్ని ఏర్పాటు చేశారు. 1846 అక్టోబర్ 16న అమెరికాలోని బోస్టన్‌లో ఉన్న మసాచుసెట్స్ జనరల్ హాస్పిటల్‌లో డాక్టర్ విలియం థామస్ గ్రీన్ మోర్టన్ ఈథర్‌ను ఉపయోగించి విజయవంతంగా తొలి అనస్థీషియా ప్రదర్శన నిర్వహించారు. ఆధునిక అనస్థీషియా అభివృద్ధికి పునాది వేసిన మార్గదర్శకుడిగా డాక్టర్ విలియం టి.జి. మోర్టన్ సేవలను, ఆయన చేసిన చారిత్రాత్మక ప్రదర్శనను ఈ సందర్భంగా ఘనంగా స్మరించుకున్నారు.
శస్త్రచికిత్సల సమయంలో నొప్పి నివారణకు, రోగి సౌకర్యానికి అనస్థీషియా ఎంత అవసరమో ఈ కార్యక్రమంలో వైద్యులు వివరించారు. కేవలం మత్తు ఇవ్వడమే కాకుండా శస్త్రచికిత్సకు ముందు, శస్త్రచికిత్స జరుగుతున్న సమయంలో, శస్త్రచికిత్స అనంతరం రోగి శ్వాస, గుండె స్పందన, రక్తపోటు వంటి కీలక శరీర విధులను నిరంతరం పర్యవేక్షించడంలో అనస్థీషియా నిపుణులు అత్యంత కీలక పాత్ర పోషిస్తారని తెలిపారు. మత్తుమందు ప్రక్రియలపై ప్రజల్లో ఉన్న అపోహలను తొలగించి శాస్త్రీయ అవగాహనను పెంపొందించడంతో పాటు, అనస్థీషియా రంగంలో అభివృద్ధి చెందుతున్న ఆధునిక సాంకేతికతలు మరియు సురక్షిత చికిత్సా విధానాలపై వైద్య సిబ్బందికి, ప్రజలకు అవగాహన కల్పించారు.
ఈ కార్యక్రమంలో ఆసుపత్రి హెచ్.ఓ.డి అండ్ చీఫ్ అనస్థీషియాలజిస్ట్ డాక్టర్ శేషయ్య, సీనియర్ అనస్థీషియాలజిస్ట్ డాక్టర్ నరేష్ కుమార్, అనస్థీషియాలజిస్టులు డాక్టర్ జె. వంశీ కృష్ణ తదితరులు పాల్గొని రోగుల భద్రత, నొప్పి నివారణ, మెరుగైన వైద్య సంరక్షణపై చైతన్యం కల్పించారు. ఈ వేడుకల్లో కిమ్స్ రీజినల్ సి.ఓ.ఓ డాక్టర్ ప్రవీణ్ కుమార్ వంచి, యూనిట్ సి.ఓ.ఓ డాక్టర్ రోహిణి ప్రియ లక్ష్మి తదితరులు పాల్గొన్నారు.