పెంబర్తిలో సైబర్ మోసాలపై బ్యాంక్ ఆఫ్ ఇండియా అవగాహన కార్యక్రమం

జనగామ ప్రతినిధి, మేజర్ న్యూస్, పెరుగుతున్న  ఆన్‌లైన్ మోసాల పట్ల ప్రజలు అప్రమత్తంగా ఉండాలని బ్యాంక్ ఆఫ్ ఇండియా మేనేజర్ మన్నె శ్రీజ సూచించారు. జనగామ మండల పరిధిలోని పెంబర్తి గ్రామంలో బ్యాంక్ ఆఫ్ ఇండియా ఆధ్వర్యంలో సైబర్ నేరాల నివారణపై ప్రత్యేక అవగాహన కార్యక్రమం నిర్వహించారు.ఈ సందర్భంగా మేనేజర్ శ్రీజ మాట్లాడుతూ.. బ్యాంకు అధికారులు ఎప్పుడూ ఫోన్ చేసి వ్యక్తిగత వివరాలు అడగరని స్పష్టం చేశారు. ప్రజలు తమ బ్యాంకు ఖాతాలకు సంబంధించిన ఓటీపీ, డెబిట్ కార్డు పిన్, పాస్‌వర్డ్, యూపీఐ పిన్ వంటి రహస్య వివరాలను ఎట్టి పరిస్థితుల్లోనూ అపరిచిత వ్యక్తులతో పంచుకోవద్దని హెచ్చరించారు.ఇటీవల కాలంలో 'డిజిటల్ అరెస్టు' పేరుతో సైబర్ నేరగాళ్లు సామాన్యులను భయభ్రాంతులకు గురిచేస్తున్నారని, అలాంటి నకిలీ ఫోన్ కాల్స్ లేదా వీడియో కాల్స్ వస్తే ఆందోళన చెందవద్దని భరోసా ఇచ్చారు. ఎవరైనా సైబర్ మోసానికి గురైతే ఆలస్యం చేయకుండా వెంటనే టోల్ ఫ్రీ నంబర్ 1930 కు కాల్ చేసి ఫిర్యాదు చేయాలని సూచించారు.ఈ కార్యక్రమంలో గ్రామ సర్పంచ్ రేఖ రాజు, బ్యాంక్ ఆఫ్ ఇండియా సిబ్బంది లక్ష్మీనారాయణ, హర్ష వర్ధన్ తో పాటు గ్రామస్తులు పెద్ద సంఖ్యలో పాల్గొన్నారు.

రిపోర్టర్ ; నవీన్ చారి ,జనగామ జిల్లా