telanagana
విద్యుత్ షాక్‌తో ఎలక్ట్రీషియన్ మృతి.. సర్పంచ్ ఇంటి ఎదుట ఆందోళన
సూర్య కరీంనగర్ ప్రతినిధి;కరీంనగర్ జిల్లా చిగురుమామిడి మండలం చిన్న ముల్కనూర్ గ్రామానికి చెందిన ప్రైవేట్ ఎలక్ట్రీషియన్ కత్తెరమల్ల రమేష్ (31) ఈ నెల 6న గ్రామంలో వీధి దీపం మరమ్మతులు చేస్తుండగా విద్యుత్ షాక్‌కు గురయ్యాడు. తీవ్ర గాయాలపాలైన ఆయన గాంధీ ఆసుపత్రిలో చికిత్స పొందుతూ మృతి చెందాడు. మృతదేహం గ్రామానికి చేరుకోవడంతో విషాదం నెలకొంది. రమేష్ మృతికి గ్రామ సర్పంచ్ సాంబారి భారతమ్మ, ఆమె భర్త కొమురయ్య కారణమంటూ మృతుడి బంధువులు ఆరోపించారు. తమకు న్యాయం చేయాలని డిమాండ్ చేస్తూ కుటుంబ సభ్యులు, మాల సంఘం నాయకులు మృతదేహంతో సర్పంచ్ ఇంటి ఎదుట ఆందోళనకు దిగారు. దీంతో చిన్న ముల్కనూర్ గ్రామంలో ఉద్రిక్త పరిస్థితులు నెలకొనగా, ఎలాంటి అవాంఛనీయ ఘటనలు చోటుచేసుకోకుండా పోలీసులు భారీగా మోహరించారు.
