తెలంగాణ సంస్కృతి, సంప్రదాయాలకు ప్రతీక బతుకమ్మ పండుగ
ఉప్పల్ నియోజకవర్గ ప్రజలకు తెలంగాణ రాష్ట్ర పండుగ బతుకమ్మ పండుగ ప్రారంభం సందర్భంగా ఉప్పల్ ఎమ్మెల్యే బండారి లక్ష్మారెడ్డి హృదయపూర్వక శుభాకాంక్షలు తెలిపారు.
తెలంగాణ ఆడబిడ్డల ఆత్మగౌరవానికి, ఆటపాటల సాంస్కృతిక వైభవానికి ప్రతీకగా నిలిచే బతుకమ్మ పండుగ మన తెలంగాణ సంస్కృతి, సంప్రదాయాలకు అద్దం పడుతుందని ఎమ్మెల్యే బండారి లక్ష్మారెడ్డి గారు అన్నారు. ప్రకృతిలో లభించే వివిధ రకాల పూలను అందంగా పేర్చి బతుకమ్మగా పూజించడం తెలంగాణ ప్రత్యేకత అని పేర్కొన్నారు.
బతుకమ్మ పండుగ తెలంగాణ ప్రజల జీవన విధానంలో అంతర్భాగమని, ఆడబిడ్డలు కుటుంబ సభ్యులు, ఆడపడుచులతో కలిసి తొమ్మిది రోజులపాటు ఆటపాటలతో ఆనందోత్సాహాల మధ్య ఈ పండుగను జరుపుకోవడం మన సంస్కృతిలోని గొప్పతనాన్ని చాటుతుందని తెలిపారు.
ఎంగిలిపూల బతుకమ్మతో ప్రారంభమై సద్దుల బతుకమ్మతో ముగిసే ఈ పండుగ రాష్ట్రవ్యాప్తంగా ప్రజల్లో ఐక్యతను, సంతోషాన్ని నింపుతుందని అన్నారు. ప్రకృతిని ఆరాధిస్తూ, పూలను పూజించే ఈ పండుగ తరతరాలుగా వస్తున్న తెలంగాణ సంప్రదాయాలకు ప్రతీకగా నిలుస్తుందని పేర్కొన్నారు.
